Prezidente Repúblika, Francisco Guterres "Lú Olo". Imajen Tatoli/Egas Cristovão

DILI, 06 setembru 2021 (TATOLI)—Prezidente Repúblika Francisco Guterres Lú Olo promulga, iha sesta-feira (03 setembru) semana kotuk kotuk promulga alterasaun dahuluk ba Lei Resensiamentu Eleitoral tanba dekretu foun ne’e haktuir ona Konstituisaun RDTL.

Notísia Relevante: PN hamoos ona númeru 2 artigu 17 hosi Lei Resensiamentu Eleitorál

Komunikadu imprensa ne’ebé Agência Tatoli asesu hosi Palásiu Prezidensiál ne’e haktuir, Dekretu ida uluk aprovadu iha 28 juñu 2021, hosi Parlamentu Nasional no Prezidénsia Repúblika simu iha 06 jullu 2021 ne’e, iha artigu balun ne’ebé Prezidente Repúblika konsidera la haktuir Konstituisaun RDTL no tanba razaun ne’e mak haruka ba Tribunal Rekursu atu tetu no foti desizaun.

Prezidente Repúblika hato’o pedidu ba Tribunal Rekursu hodi halo fiskalizasaun preventiva ba konstitusionalidade ba alínea k) hosi númeru 1 artigu 13 no númeru 2 artigu 17 no númeru 4 artigu 29.

Akórdaun Tribunal Rekursu deklara katak artigu 17 númeru 2 hosi Dekretu Parlamentu Nasionál mak inkonstitusionál tanba la respeita direitu ema nian ne’ebé previstu iha artigu 38 Konstituisaun RDTL kona-ba fó-sai dadus pesoál.

Tanba Akórdaun husi Tribunal Rekursu mak konsidera artigu 17, númeru 2 inkonstitusionál mak Prezidente Repúblika tenke foti desizaun veta Dekretu ne’e no haruka fila ba Parlamentu Nasional iha 9 agostu 2021, akompaña ho kópia Akórdaun nian.

Parlamentu Nasionál halo fali apresiasaun ba Dekretu vetadu hosi Prezidente Repúblika no deside hasai tiha artigu 17, númeru 2) no haruka mai Prezidente Repúblika iha 31 agostu 2021.

Tamba laiha ona inkonstitusionalidade, Prezidente Repúblika promulga, iha 3 setembru 2021, Dekretu Parlamentu Nasionál ho númeru 43/V.

Tuir preámbulu hato’o hosi Parlamentu Nasional, alterasaun dahuluk ba Lei Resenseamentu Eleitoral halo hodi hadi’ak sistema resensiamentu eleitorál liuhosi teknolojia no inovasaun ne’ebé loke dalan atu identifika diakliu kada eleitór, ho risku erru ne’ebé ki’ik tebes.

Aleinde impresaun dijital, sei identifika eleitór ida-idak bazea ba ninia karaterístika fízika (dadus biométrikus).

Kartaun eleitór ida-idak sei iha mós “chip” eletróniku ho informasaun hotu-hotu kona-ba titular kartaun, mai kedas ho mekanismu seguransa ne’ebé garante katak sei la viola identidade eleitór nian.

Jornalista : Osória Marques

Editór      :  Cancio Ximenes

HAKEREK NO HATÁN

Please enter your comment!
Please enter your name here