Bispu Dioseze Baucau, Mgr. Basílio do Nascimento. Imajen Tatoli/Joanico de Araújo.

DILI, 30 outubro 2021 (TATOLI) — Primeiru-Ministru (PM), Taur Matan Ruak, sente sokadu, triste no lamentável ho notísia tristeza kona-ba Bispu Dioseze Baucau, Dom Basílio do Nascimento nia mate derrepente, iha sábadu ne’e.

“Há’u sente sokadu, triste no lamentável tebes, wainhira rona notísia tristeza kona-ba Amu Bispu Baukau Dom Basílio do Nascimento nia mate ne’ebé derrepente de’it, ha’u la espera katak ita-nia Amu Bispu bele hasoru situasaun hanesan ne’e, maibé ne’e Maromak nia planu ita hotu la hatene,” Xefe Governu hato’o sentiment tristeza ne’e liuhosi nota imprensa ne’ebé Agência Tatoli, asesu sábadu ne’e.

Tanba ne’e, Xefe Ezekutivu ne’e hato’o profunda sentida konsolénsia kle’an ba família ne’ebé Bispu husik hela.

“Hodi há’u nia naran rasik, há’u-nia espoza no Governu Timor-Leste nia naran, hakarak hato’o profunda sentida kondolénsia ne’ebé kle’an ba família hosi Amu Bispu nian ein-partikulár, sarani Dioseze Baucau no Uma Kreda Timor-Leste ba lakon bibi atan di’ak ne’ebé serbí ona Dioseze Baucau besik tinan 25. Mai ita hotu hasa’e orasaun ba Aman Maromak atu simu ita-nia saudozu iha Nai nia Kadunan Santu no husu atu kontinua tau matan mai ita,” Taur afirma.

Bispu Diozese Baucau, Dom Basílio do Nascimento hakotu iis iha Hospital Nacional Guido Valadares (HNGV) hafoin transporta hosi munisípiu Covlaima tanba enfrenta moras kardiovaskular.

Iha loron 28 outubru 2021, Bispu Diozese Baucau ne’e hala’o misa ordenasaun ba Padre Indra Texeira no João Guterres iha Igreja Covalima. Nune’e iha loron 29 outubru Bispu sei dirije misa ba padre João Guterres no ohin dadeersan sei misa ba padre Indra Texeira.

Iha misa ohin dadeersan ne’e, Bispu Basílio hetan atakasaun kardiovaskular (moras fuan) no ekipa hosi Covalima transporta liuhosi aviaun mai aeroportu internasionál Nicolau Lobato, Dili.

Hosi aeroportu ekipa hosi saúde lori kedas ba HNGV maibé esforsu hosi médiku sira labele salva Bispu Dioseze Baucau ne’e.

Notísia relevante: Dom Basílio hakotu iis tanba enfrenta moras kardiovaskular

Jornalista: Antónia Gusmão.

Editór: Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here