Ministru Finansa, Rui Augusto Gomes. Imajen TATOLI/Francisco Sony

DILI, 06 agostu 2021 (TATOLI)–Ministru Finansa (MF), Rui Augusto Gomes, hasoru malu ho Prezidente Repúblika (PR), Francisco Guterres ‘Lú Olo’, hodi informa kona-ba polítika investimentu fundu petrolíferu tanba antes ne’e Xefe Governu preokupa ho sustentabilidade fundu petrolíferu.

“Ita iha segmentasaun fundu ba fatin rua, ba karteira likidés atu garante katak durante próximu tinan-tolu ita bele iha osan atu finansia Orsamentu Jerál Estadu (OJE) no seluk mak karteira kreximentu, katak osan la foti hosi likidés, maibé ita investe filafali iha asaun, nune’e aban bainrua nia retornu bele finansia fali likidés,” Ministru Rui Augostu Gomes, informa hafoin hasoru malu ho Xefe Governu, iha Palásiu Prezidensiál, Aitarak-laran, sesta ne’e.

Notísia relevante: PR Preokupa Fundu Minarai Lakon Reseita Liu Millaun $840

Tuir governante ne’e, razaun halo segmentasaun fundu tanba hahú tinan 2019 to’o agora, levantamentu fundu petrolíferu sempre liu Rendimentu Sustentável Estimadu (RSE), ne’ebé sei fó risku boot ba sustentabilidade fundu soberanu.

Enkuantu, bazeia lei númeru 9/2005 kona-ba fundu petrolíferu, iha artigu 9 kona-ba tranferénsia liu RSE, temi katak levantamentu bele to’o 3% de’it.

“Maibé foti 5% ne’e signifika bainhira kontinua ritmu ne’e, maka fundu ne’e tinan 10 ka 11 tan sei hotu, ida-ne’e mak problema prinsipál ida,” nia akresenta.

Ministru mós relata katak reseita fundu petrolíferu hahú monu tanba presu mina-rai no volume produsaun.

Notísia relevante: Kapitál fundu petrolíferu Timor-Leste sa’e ba biliaun $19,49

“Maski foin lalais ita rona katak Bayu-undan bele prolonga tan produsaun tinan 2 to’o 3, maibé osan ne’ebé ita espera atu hetan purvolta millaun $200 ka $300 laiha. Enkuantu, Timor-Leste seidauk dezenvolve kampu Greater Sunrise maka reseita ida-ne’e de’it,” nia hatutan.

Ministru fó ezemplu, retornu investimentu sira ne’ebé Timor-Leste halo daudaun ne’e, kiik liu fali buat ne’ebé espera, tanba la konsege kontrola merkadu finanseiru no ema seluk mak uza osan atu investe iha buat oioin.

“Tanba volatilidade ida-ne’e, maski Timór kaer asaun sira-ne’e tau 100% iha asaun nia retornu, maibé sei la to’o no 3%, signifika tenke hamenus risku ba fundu ne’e rasik liuhosi segmentasaun ba fundu,” nia subliña.

Iha OJE 2021 ho montante biliaun $1,895, foti hosi reseita fundu petrolíferu hamutuk biliaun $1,377 no reseita naun petrolíferu hamutuk millaun $508.

Enkuantu, hosi totál reseita fundu petrolíferu biliaun $1,337 no millaun $547 foti bazeia ba RSE no transferénsia superiór liu RSE millaun $828.

Iha artigu 9d lei fundu petrolíferu, mensiona katak bainhira Governu foti orsamentu finansia despeza OJE, mak presiza esplikasaun detalladu kona-ba motivu ne’ebé konsidera hanesan interese Timor-Leste ba longu prazu, atu efetua transferénsia ho montante superiór RSE.

Jornalista : Osória Marques

Editora     : Julia Chatarina

HAKEREK NO HATÁN

Please enter your comment!
Please enter your name here