Prezidente Konsellu Diretiva Nasionál Partidu Congresso Nacional Reconstrução de Timor-Leste (CNRT), Dionísio da Costa Babo Soares. Imajen Tatoli/António Gonçalves.

DILI, 29 outubru 2021 (TATOLI)—Prezidente Konsellu Diretiva Nasionál Partidu Congresso Nacional Reconstrução de Timor-Leste (CNRT), Dionísio da Costa Babo Soares, hateten kandidatura Prezidente Repúblika hosi partidu CNRT sei deside liuhosi konferénsia nasionál.

Partidu CNRT nakloke ba alternativu sira hanesan figura kandidatu Prezidente Repúblika bele mai hosi CNRT no bele mai hosi nia figura rasik no ema independente ne’ebé CNRT fó konfiansa hodi bele kompete iha eleisaun prezidénsial 2022.

Notísia Relevante: Prezidente Repúblika sei dekreta kalendáriu eleisaun prezidensiál iha janeiru 2022

“CNRT hanesan partidu ida nakloke iha alternativu rua. Ida, bele mai hosi CNRT rasik no ida fali mai hosi ema independente ne’ebé CNRT fó konfiansa. Maibé, antes to’o iha ne’ebá, sei liuhosi konferénsia nasionál,” Dionísio da Costa Babo Soares hateten ba Agência Tatoli iha sede CNRT Bairro dos Grilhos, Dili, sesta ne’e.

Ida-ne’e, na hateten, hanesan kompromisu polítiku partidu CNRT nian, tanba ne’e to’o agora CNRT seidauk deside kandidatu ida tuir desizaun Konsellu Polítiku Nasionál.

Maibé, tuir nia, komunikasaun internál ko’alia mós kandidatura PR, atu kompete bele mai hosi partidu rasik ka apoiu kandidatu indepedente ruma, nune’e sei hein desizaun hosi konferénsia nasionál.

Iha kongresu ne’e mak sei deside kritéira saida mak CNRT hakarak kandidatu ida prenxe ho kondisaun atu bele sai nu’udar Prezidente Repúblika hodi kompete iha eleisaun prezidensiál 2022.

“Aposta ba kandidatu ida-ne’ebé prenxe kritéira ho kondisaun, ne’ebé CNRT ezije atu bele lidera rai Timor-Leste tanba sai Prezidente Repúblika la’ós figura fasil, nune’e tenke prenxe rekezitu,” Dionísio Babo hateten.

CNRT iha konfiansa povu nian makaas tebes tanba ho figura lidér istóriku Kay Rala Xanana Gusmão, nune’e sei manan iha eleisaun prezidensiál 2022.

Tanba, nia dehan, atu hasoru eleisaun prezidensiál ne’ebé sei akontese iha 2022 ne’e, CNRT preparadu hodi kompete.

“CNRT preparadu ba eleisaun prezidensiál 2022,” Dionísio da Costa Babo Soares hateten.

Notísia Relevante: Partidu Polítiku bele halo kongresu hafoin eleisaun prezidensiál 2022

Daudaun ne’e, CNRT hala’o hela re-estruturasaun sub-nasionál suku no aldeia, nivél postu administrativu iha territóriu nasionál ne’ebé kuaze termina ona, no hela postu administrativu iha munisípiu Viqueque mak seidauk no sei hala’o iha loron 06 fulan-novembru tinan 2021.

Re-estruturasaun ne’e ramata, sei kontinua fila-fali iha nivél munisípiu iha fulan novembru no hafoin finaliza, partidu CNRT sei hala’o konferénsia nasionál ne’ebé tuir planu sei hala’o iha fulan-dezembru 2021 hodi hili estrutura foun períodu 2022-2027.

“Re-estrutrasaun prosesu normal, estrutura hotu-hotu ne’ebé rejistadu hanesan kuadru mai tuir konferénsia iha nivél postu administrative, maibé antes mai hala’o ona reajustamentu estrutura iha baze,” nia dehan.

Partidu dinámiku hodi halo re-estrutura hosi baze mai leten hanesan kaderizasaun tuir estatutu partidu nian, no halo mós konsolidasaun iha atividade re-estruturasaun hanesan iha Dili iha pakote barak mak hakarak tuur iha estrutura, nune’e halo kampaña iha partidu laran hodi tama-sai suku.

Notísia Relevante: STAE-CNE lansa resensiamentu eleitorál ba preparasaun eleisaun prezidensiál 2022

Jornlista : Nelson de Sousa

Editór     : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here