iklan

EDUKASAUN, HEADLINE, MUNISÍPIU, VIQUEQUE

Grupu komunitáriu preparadu integra iha konstrusaun eskola 18 iha Viqueque

Grupu komunitáriu preparadu integra iha konstrusaun eskola 18 iha Viqueque

Kondisaun eskola EBF Ualaque, iha suku Uaitame, tersa (19/10). Imajen TATOLI/Vitorino Lopes da Costa

VIQUEQUE, 19 outubru 2021 (TATOLI)–Diretór Servisu Edukasaun munisípiu Viqueque, Emidio Amaral, informa, grupu komunitáriu ne’ebé toma konta ba konstrusaun eskola hamutuk 18 preparadu submete konta bankária ba edukasaun hodi integra iha konstrusaun obra infraestrutura edukasaun ne’e.

“Konstrusaun edifísiu eskola hamutuk 18 iha munisípiu Viqueque ne’e, ita-nia grupu sira kuaze preparadu hotu no hein osan 25% tama grupu sira-nia konta bankária mak foin hahú konstrusaun,” Diretór hateten ba Agência TATOLI, iha ninia kanaar fatin, Viqueque, tersa ne’e.

Planu ne’e Governu oferese direta ba grupu traballu komunitáriu, ne’ebé grupu ne’e rasik mak sei jere fali osan ba konstrusaun ne’e, ho hanoin ida atu loke kampu traballu ba komunidade lokál no rekuperasaun ekonómika ne’ebé hetan efeitu maka’as tanba COVID-19.

Iha fatin hanesan, Prezidente Grupu ba konstrusaun Eskola Bázika Filiál (EBF), Bencislão Martins, hateten, grupu traballu estabelesidu ona inklui submete ona konta bankária ba administrasaun munisipál, nune’e hein de’it transfénsia hodi hahú konstrusaun.

EBF Ualaque, lokaliza iha aldeia Sana, suku Uaitame, postu administrativu Uatulari, munisípiu Viqueque.

“Ami-nia grupu inklui tékniku sira preparadu ona no ami hein de’it orsamentu,” nia akresenta.

Totál kustu ba eskola hamutuk 18 iha Viqueque hamutuk $106.874,42.

Jornalista : Vitorino Lopes da Costa

Editora     : Julia Chatarina

iklan
iklan

Leave a Reply

iklan
error: Content is protected !!