Prezidente Parlamentu Nasional, Aniceto Guterres. Imajen Tatoli/Antonio Goncalves.

DILI, 28 outubru 2021 (TATOLI)—Prezidente Parlamentu Nasionál, Deputadu Aniceto Loguinhos Guterres Lopes, hateten Parlamentu Nasionál sei hato’o votu pezár ba eróiu Max Stahl ne’ebé hakotu iis iha kinta (28/10) dadeer, iha tuku 04h33 iha Brisbane, Austrália.

Notísia Relevante: Max Stahl luta ba umanidade: “In Cold Blood: The Massacre of East Timor”

“Parlamentu Nasionál hanesan órgaun kolejiál sei pasa rezolusaun ida hodi fó votu pezár ba éroiu Max Stahl nia mate hodi hato’o sentiu kondolénsia ba família,” Deputadu Aniceto Longuinhos Guterres Lopes hateten ba jornalista sira iha Parlamentu Nasionál, kinta ne’e.

Loron ohin, nia dehan, rona informasaun katak timor-oan sira-nia belun boot no éroi Max Stahl hakotu ona iis hanesan tristeza boot ida.

Max Stahl ninia kontribuisaun ba luta libertasaun Timor-Leste nian boot tebes ne’ebé filma masakre Santa Cruz 12 novembru 1991 hodi haklaken sofrimentu povu Timor-Leste nian ba mundu tomak.

“Max Stahl hanesan kombatente ida ba luta libertasaun nasionál,” nia dehan.

Biografia

Jornalista no realizadór filme dokumentáriu, Cristopher Wenner koñesidu liu ho naran Max Stahl, moris iha Inglaterra, 6 dezembru 1954.

Nia mai hosi familia diplomata, avó maternu diplomata Sueku, ne’ebé hetan mós priviléjiu sai hanesan Diretór Instituisaun Nobel liu tinan-20. Nia aman, Cristopher Max Stahl, diplomata Suísa no inan franseza ho maun-alin hamutuk na’in tolu.

Tanba mai hosi família diplomata, Max Stahl no nia maun-alin sira familiariza ho problema sira internasionál no sempre muda hosi nasaun ida ba nasaun seluk hanesan Bolívia, El Salvadór, Austria no Inglaterra.

Nia estuda literatura iha Universidade Oxford, Inglaterra no ko’alia fluentemente inglés, fransés, alemaun, españól, sueku no portugés. Nia mós hatene uitoan ko’alia rusu no árabe.

Antes sai jornalista, Max Stahl hahú uluk nia karreira hanesan atór iha teatru no iha programa televizaun dedika ba labarik sira, iha Inglaterra.

Nia vokasaun nu’udar repórter funu mosu bainhira nia moris ho nia família iha El Salvador, fatin nia aman haknaar-an nu’udar embaixadór. No iha nasaun ne’e duni mak nia komesa halo reportájen kona-ba funu-sivil (guerra civil) ne’ebé akontese entre 1979 to’o 1992. Hosi ne’e ba oin, nia ba fatifatin hodi relata kona-ba funu hanesan iha Chechénia, Jeórjia, Jugoslávia no to’o mai mós Timor-Leste.

Max Stahl hetan esperiénsia moruk oioin nu’udar repórter funu: sai dadur, haree nia maluk repórter sira mate iha nia sorin, moris susar ho gerrilleiru sira iha ai-laran, testemuña ba jenosidu no masakre hanesan akontese iha Semitériu Santa Cruz Díli, iha 1991, ne’ebé lori nia hetan prémiu oioin no ida maka, Rory Peck Award, prémiu ba operadór kámara ne’ebé arriska nia moris iha reportajen.

Hatán ba konvite hosi kuadru rezisténsia timoroan nian, Max Stahl ne’ebé haksumik-an nu’udar turista, sama-ain dahuluk iha Timor-Leste, iha 30 agostu 1991. Durante nia estadia, nia entrevista ho líder sira hosi frente klandestina no mós guerilla hanesan Komandante David Alex “Daitula”, Nino Konis Santa no seluseluk tan.

Max Stahl nia filme dokumentáriu ho títulu: “In Cold Blood: The Massacre of East Timor”, kona-ba masakre Santa Cruz, ne’ebé nia rasik mak rejista militár Indonézia sira-nia brutalidade hodi oho joven-timoroan sira, la’o hadulas mundu no loke Estadu barak nia matan hodi fó razaun ba timoroan sira-nia luta atu ukun rasik-an. Filmajen kona-ba Massakre Santa Cruz konsege lori sai ba li’ur ho tulun husi ativista Olandeza, Saskia Kouwenberg.

Luta ida-ne’ebé iha tinan-1999, lori fali Max Stahl filamai Timor-Leste dala-ida tan, hodi rejista timoroan sira-nia sakrifísiu no reziliénsia hodi hasoru dezafiu oioin, molok ho aten-barani determina liuhosi referendu, atu sai hanesan nasaun Repúblika Demokrátika Timor-Leste, ne’ebé formalmente hahú iha 20 maiu 2002.

Atu prezerva istória luta timoroan sira-nian, Max Stahl harii no jere rasik sentru arkivu audiovizual ho nia naran, Centro Audiovisual Max Stahl, ne’ebé rejista akontesimentus istóriku ne’ebé nia halibur durante tinan-25 nia laran. No arkivu sira-ne’ebé iha sentru ne’e, hetan mós rekoñesimentu hosi Organizasaun Nasaun Unida ba Edukasaun, Siénsia no Kultura, UNESCO (sigla-inglés) hanesan “Rejistu ba Mundu nia Memória”.

Ba fin edukasaun no investigasaun, Centro Audiovisual Max Stahl mós servisu hamutuk ho Universidade de Coimbra, Portugal, hodi arkiva-online dokumentu istóriku sira ne’ebé sentru ne’e iha.

Estadu Timor-Leste rekoñese Max Stahl ninia esforsu no dedikasaun hodi internasionaliza kazu timoroan sira-nian, iha tinan-2009, kondekora Max Stahl ho Ordem de Timor-Leste ho Grau Insígnia.

Notísia Relevante: Governu Timor-Leste hato’o sentidu lutu ba falesimentu éroi Max Stahl

Jornalista : Nelson de Sousa

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here