Primeiru Ministru, Taur Matan Ruak. Imajen TATOLI/Francisco Sony.

DILI, 28 outubru 2021 (TATOLI)—Primeiru-Ministru (PM), Taur Matan Ruak, lori Governu nia naran hato’o sentidu lutu ba falesimentu éroi Max Stahl ne’ebé hakotu iis iha ohin (kinta, 18 outubru 2021) dadeer, iha tuku 04h33 iha Brisbane, Austrália.

“Manifesta sentidu kondolénsia lakon jornalista amigu Timor-Leste ida no fó korajen ba família bele akompaña situasaun ho serenidade kalma ho forsa no korajen,” Primeiru-Ministru, Taur Matan Ruak, hateten ba jornalista sira hafoin ramata sorumutu ho Prezidente Repúblika Francisco Guterres Lú-Olo, iha Palásiu Prezidensiál Ncolau Lobato, Bairruu Pite, Dili, kinta ne’e.

Xefe Governu hateten, kontribuisaun Max Stahl iha partisipasaun luta libertasaun Timor-Leste nian boot tebes, hanensan halo filmazen Masakre Santa Cruz 12 novembru 1991 hodi fó sai ba mundu hatene sofrementu povu TL nian.

Saudozu Max Stahl mós halo ligasaun ho Falntil sira iha ai-laran ne’ebé di’ak hodi halo entervista sira no vizita fatin-fatin liu-liu hamutuk h saudozu David Alex Daitula, no ho nia kontribuisaun hotu mak Estadu Timor-Leste sertifika matebian sai nu’udar sidadaun Timorense.

Durante sorumutu ne’e, Prezidente Repúblika, Francisco Guterres Lú Olo, bolu atensaun  ba Governu Timor-Leste hodi akompaña prosesu fúnebre saudozu Max Stahl nian.

Xefe Governu, Taur Matan Ruak hateten Governu preparadu haree porsesu saida mak la’o ona no presiza apoiu naturalmente sei fó tuir kondisaun ne’ebé iha.

Primeiru-Ministru hateten, tuir informasaun ne’ebé simu hosi família haktuir katak prosesu transladasaun matebian nia mate-isin sei la lori mai Timor-Leste, maibé hakarak lori fila ba matebian ninia sinzas prosesu akremasaun (sunu) tuir relijiaun matebian nian, hafoin nia latun mak sei lori mai Timor-Leste.

“Prosesu transladasaun laiha tanba tuir informasaun ne’ebé Governu hatene, primeiru akremasaun (sunu) depois nia latun mak família sira lori mai Timor-Leste,” nia dehan.

Tanba ne’e, Governu atensaun hela pasu saida mak bele halo liu-liu família sira no simu informasaun maibé seida’uk ofisiál no Governu hein de’it prosesu saida mak la’o naturalmente sei haree no agora sedu labele fó uluk informasaun detaillu.

Biografia

Jornalista no realizadór filme dokumentáriu, Cristopher Wenner koñesidu liu ho naran Max Stahl, moris iha Inglaterra, 6 dezembru 1954.

Nia mai hosi familia diplomata, avó maternu diplomata Sueku, ne’ebé hetan mós priviléjiu sai hanesan Diretór Instituisaun Nobel liu tinan-20. Nia aman, Cristopher Max Stahl, diplomata Suísa no inan franseza ho maun-alin hamutuk na’in tolu.

Tanba mai hosi família diplomata, Max Stahl no nia maun-alin sira familiariza ho problema sira internasionál no sempre muda hosi nasaun ida ba nasaun seluk hanesan Bolívia, El Salvadór, Austria no Inglaterra.

Nia estuda literatura iha Universidade Oxford, Inglaterra no ko’alia fluentemente inglés, fransés, alemaun, españól, sueku no portugés. Nia mós hatene uitoan ko’alia rusu no árabe.

Antes sai jornalista, Max Stahl hahú uluk nia karreira hanesan atór iha teatru no iha programa televizaun dedika ba labarik sira, iha Inglaterra.

Nia vokasaun nu’udar repórter funu mosu bainhira nia moris ho nia família iha El Salvador, fatin nia aman haknaar-an nu’udar embaixadór. No iha nasaun ne’e duni mak nia komesa halo reportájen kona-ba funu-sivil (guerra civil) ne’ebé akontese entre 1979 to’o 1992. Hosi ne’e ba oin, nia ba fatifatin hodi relata kona-ba funu hanesan iha Chechénia, Jeórjia, Jugoslávia no to’o mai mós Timor-Leste.

Max Stahl hetan esperiénsia moruk oioin nu’udar repórter funu: sai dadur, haree nia maluk repórter sira mate iha nia sorin, moris susar ho gerrilleiru sira iha ai-laran, testemuña ba jenosidu no masakre hanesan akontese iha Semitériu Santa Cruz Díli, iha 1991, ne’ebé lori nia hetan prémiu oioin no ida maka, Rory Peck Award, prémiu ba operadór kámara ne’ebé arriska nia moris iha reportajen.

Hatán ba konvite hosi kuadru rezisténsia timoroan nian, Max Stahl ne’ebé haksumik-an nu’udar turista, sama-ain dahuluk iha Timor-Leste, iha 30 agostu 1991. Durante nia estadia, nia entrevista ho líder sira hosi frente klandestina no mós guerilla hanesan Komandante David Alex “Daitula”, Nino Konis Santa no seluseluk tan.

Max Stahl nia filme dokumentáriu ho títulu: “In Cold Blood: The Massacre of East Timor”, kona-ba masakre Santa Cruz, ne’ebé nia rasik mak rejista militár Indonézia sira-nia brutalidade hodi oho joven-timoroan sira, la’o hadulas mundu no loke Estadu barak nia matan hodi fó razaun ba timoroan sira-nia luta atu ukun rasik-an. Filmajen kona-ba Massakre Santa Cruz konsege lori sai ba li’ur ho tulun husi ativista Olandeza, Saskia Kouwenberg.

Luta ida-ne’ebé iha tinan-1999, lori fali Max Stahl filamai Timor-Leste dala-ida tan, hodi rejista timoroan sira-nia sakrifísiu no reziliénsia hodi hasoru dezafiu oioin, molok ho aten-barani determina liuhosi referendu, atu sai hanesan nasaun Repúblika Demokrátika Timor-Leste, ne’ebé formalmente hahú iha 20 maiu 2002.

Atu prezerva istória luta timoroan sira-nian, Max Stahl harii no jere rasik sentru arkivu audiovizual ho nia naran, Centro Audiovisual Max Stahl, ne’ebé rejista akontesimentus istóriku ne’ebé nia halibur durante tinan-25 nia laran. No arkivu sira-ne’ebé iha sentru ne’e, hetan mós rekoñesimentu hosi Organizasaun Nasaun Unida ba Edukasaun, Siénsia no Kultura, UNESCO (sigla-inglés) hanesan “Rejistu ba Mundu nia Memória”.

Ba fin edukasaun no investigasaun, Centro Audiovisual Max Stahl mós servisu hamutuk ho Universidade de Coimbra, Portugal, hodi arkiva-online dokumentu istóriku sira ne’ebé sentru ne’e iha.

Estadu Timor-Leste rekoñese Max Stahl ninia esforsu no dedikasaun hodi internasionaliza kazu timoroan sira-nian, iha tinan-2009, kondekora Max Stahl ho Ordem de Timor-Leste ho Grau Insígnia.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here