Estudante Eskola 30 agostu ne’ebé simu ona vasina Pfizer hatudu kartaun vasinasaun, iha resintu eskola, Comoro, kuarta (27/10). Imajen TATOLI/António Gonçalves

DILI, 27 outubru 2021 (TATOLI)–Ministru Edukasaun, Juventude no Desportu (MEJD), Armindo Maia, husu profesór no inan-aman hosi estudante idade 12 to’o 17, atu apoia programa vasina tipu Pfizer ba oan sira, nune’e bele projete hosi COVID-19.

Ministra Saúde, Odete Maria Freitas Belo, Ministru Edukasaun, Juventude no Desportu, Armindo Maia, Enkaregadu Negósiu hosi Embaixada EUA iha Timor-Leste, Tom Daley no representante UNICEF, partisipa lansamentu vasina Pfizer iha Eskola EBC 30 agostu, Comoro, kuarta (27/10). Imajen TATOLI/António Gonçalves

“Favor boot ida, ita hanesan mestre no inan aman tenke iha responsabilidade ba programa ne’e, ita presiza tulun sira atu hetan saúde di’ak hodi proteje hosi moras. Tanba ne’e, mai ita hotu fó liman ba malu hodi apoia programa vasinasaun ba labarik sira atubele proteje-an, komunidade no nasaun,” Ministru hateten iha seremónia lansamentu vasinasaun Pfizer ba estudante sira iha Eskola Ensinu Báziku Sentrál (EBC, sigla portugés) 30 agostu, Comoro, kuarta ne’e.

Ministériu Saúde (MS) liuhosi Servisu Saúde munisípiu Dili lansa vasina Pfizer ba estudante iha eskola neen hanesan Eskola 04 setembru, Eskola Nuu-laran, Eskola Paulo VI, Sentru Ensinu Salon Bebonuk, Eskola 30 agostu, Rekorente Becora no Nobel da Páz.

Notísia relevante: Estudante eskola neen iha munisípiu Dili hahú simu vasina Pfizer

Ba kestaun imunizasaun, Ministru konsidera inan-aman presiza motiva labarik sira simu vasina.

Estudante Eskola EBC 30 agostu forma atu simu formuláriu konkordánsia vasina Pfizer, iha resintu eskola, Comoro, kuarta (27/10). Imajen TATOLI/António Gonçalves

“Ita iha responsabilidade tulun oan sira, labele hanesan akontese iha munisípiu seluk bainhira bolu ba vasina, inan-aman sira lakohi tuir tanba fiar fali ba buat seluk. Hanesan Ministru Edukasaun, husu ba mestre no inan-aman labele impede oan sira simu vasina,” nia subliña.

Nune’e mós, Reprezentante inan-aman, Ernesto Gusmão, apresia no kontente tanba ninia oan bele simu vasina no konsidera hanesan responsabilidade ida atu apoia programa vasinasaun atu bele proteje oan sira hosi COVID-19.

“Hanesan aman, ha’u hakarak oan sira tenke hetan vasinasaun, tanba durante ne’e sira iha hela udan-laran, tanba ne’e ha’u hakarak sira tenke hetan guarda chuva atu proteje sira hosi udan,” nia akresenta.

Pesoál saúde fó vasina Pfizer ba estudante Eskola EBC 30 agostu, iha resintu eskola, Comoro, kuarta (27/10). Imajen TATOLI/António Gonçalves

Estudante Eskola 30 agostu Comoro, Lusiana Boavida da Costa Gusmão, hateten, durante ne’e sira rona de’it vasinasaun bele lori impaktu ba ema-nia saúde, nune’e hafoin simu vasina sente hakmatek.

“Husu ba kolega sira atu mai simu vasina tanba vasina di’ak ba saúde hodi proteje ema hosi moras COVID-19,” nia enkoraja.

Seremónia lansamentu vasinasaun Pfizer iha Eskola 30 de agostu, reprezenta hosi labarik na’in-10, hafoin loke ba públiku atubele asesu.

Jornalista : Tomé Amado

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here