Seremónia isár bandeira iha Munisípiu Covalima, Imajen Tatoli/Dok

DILI, 27 outubru 2021 (TATOLI)—Governu liuhosi Ministériu Administrasaun Estatál (MAE) aloka orsamentu hamutuk rihun $400 ba selebrasaun loron proklamasaun 28 novembru ba dala-46 (28 novembru 1975-28 novembru 2021) ne’ebé tuir planu sei realiza iha munisípiu Baucau.

Notísia Relevante: Baucau hahú halo preparasaun ba selebrasaun 28 novembru

“Orsamentu ne’ebé aloka ba selebrasaun ne’e hosi Orsamentu Jerál Estadu 2021 nian, mak Ministériu Administrasaun Estatál aloka kuaze rihun $400 hodi selebra loron proklamasaun 28 novembru iha Baucau,” Ministru Administrasaun Estatál (MAE) Miguel Pereira de Carvalho ne’e hateten ba jornalista sira iha Palásiu Governu, Dili, kuarta ne’e.

Governante ne’e informa, selebrasaun loron proklamasaun 28 novembru tinan 2021 sei sentraliza nia selebrasaun iha munisípiu Baucau iha área Triloka no iha tempu hanesan mós realiza selebrasaun iha munisípiu sira seluk.

“Agora daudaun komisaun organizadora ne’ebé kompostu hosi Governu sentrál no Autoridade Munisípál Baucau halo preparativu sira hodi realiza selebrasaun ne’e,” nia dehan.

Maske nune’e, iha selebrasaun 28 novembru ba dala-46 ne’e sei hala’o mós atividade oioin hodi komemora Proklamasaun Independénsia Repúblika Demokrátika Timor-Leste.

“Selebrasaun ne’e iha atividade barak mak sei realiza hanesan desportu komunitáriu, desportu sira iha eskola no atividade feira. Alende ne’e, realiza mós inaugurasaun ba projetu sira-ne’ebé iha tinan ne’e implementa hosi ministériu barak, hanesan ba sira ne’ebé prontu ona atu halo inaugurasaun bele halo mós iha tempu sira antes 28 Novembru,” Governante ne’e informa.

Entretantu, iha selebrasaun loron proklamasaun 28 novembru ba dala-46 ne’e, Ministériu Administrasaun Estatál (MAE) planeia ona atu husu autorizasaun Primeiru-Ministru, Taur Matan Ruak, atu membru Governu balun sei ba prezide selebrasaun Proklamasaun Independénsia iha munisípiu idak-idak.

Notísia Relevante: Selebrasaun 28 novembru, PAM planeia ilumina estrada Baucau iha tempu kalan

Jornalista : Nelia Fernandes

Editór       : Cancio Ximenes

 

PUBLISIDADEiklan

HAKEREK NO HATÁN

Please enter your comment!
Please enter your name here