Korpu Ichar bandeira hahú prepara-aan ba selebrasaun loron proklamasaun 28 novembru iha autoridade munisípiu Baucau, kinta (21/10). Imajen Agência TATOLI/Natalino Belo.

BAUCAU, 21 outubru 2021 (TATOLI) – Autoridade munisipál Baucau hahú halo preparasaun ba selebrasaun loron 28 Novembru ba dala-46 nune’e oras ne’e hahú ateru fatin no treinu ekipa grupu ichar bandeira nasionál.

Sekretáriu Autoridade Munisípal, Simão dos Santos Marques Pinheiro informa, autoridade munisipál nu’udar sub-komisaun ne’ebé tutela ba komisaun nasionál ne’ebé tutela iha Ministériu Admistrasaun Estatal (MAE).

“Agora daudaun sub-komisaun autoridade munisípiu Baucau halo la’o uluk ona mak preparasaun ba sira-ne’ebé halo atu ichar bandeira, tuir loloos reprezenta hosi munisípiu hotu maibé tanba pandemia COVID-19 entaun hosi Nasionál husu Baucau mak idak-idak prepara ninia ema rasik,” Sekretáriu Munisípal Baucau hateten iha ninia knar fatin, kinta ne’e.

Nia dehan, iha tinan ida-ne’e korpu ichar bandeira hosi munisípiu seluk sei la envolve tanba pandemia nune’e responsável direita hosi munisípiu Baucau nu’udar uma-na’in.

Totál membru ne’ebé prepara hamutuk na’in-50 no sei kompleta tán na’in-25 ne’ebé sei responsável direita hosi komisaun nasionál.

Kona-ba fatin selebrasaun, daudaun ne’e liuhosi Institutu Jestaun no Ekipamentu (IGE, sigla portugés) hahú ateru no hadi’a dalan diresaun Darsula ba Fatumaka tanba tuir planu kari ai-funan iha Osuáriu.

“Serbisu balun, liuliu seksaun lojístiku la’o ona lideradu hosi obra públika, daudaun ne’e organiza IJE hamoos no ateru ona fatin ba preparasaun nian,” Simão akresenta.

Atividade ne’ebé sei realiza mak espozisaun ne’ebé sei responsabilidade hosi Ministériu Turismu Komérsiu no Industria (MTKI), kompetisaun desportu hosi Sekretaria Estadu Juventude no Desportu (SEJD).

Hosi Autoridade Munisípiu Baucau mós propoin kompetisaun jogu divertementu seluk hanesan sa’e-bua, dada-tali no seluk tán.

“Posivelmente ami mós aloka osan autoridade nian ne’ebé kada tinan aloka hodi responde ba atividade refere hamutuk $6.000,” Simão argumenta.

Simão garante seguransa durante selebrasaun 28 novembru, liuliu iha fatin realiza serimónia tanba autoridade seguransa hanesan PNTL no F-FDTL sei asegura fatin refere.

Entretantu, selebrasaun loron proklamasaun independénsia 28 novembru sei realiza iha aldeia Darsula, suku Gariuai, postu administrativu Baucau vila.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here