Primeiru-Ministru, Taur Matan Ruak, tersa ne’e partisipa iha serimónia rituál atu halo perfurasaun mina-matan Feto Kmaus no Feto Liurai. Imajen Tatoli/Celestina Teles.

COVALIMA, 26 outubru 2021 (TATOLI)—Primeiru-Ministru, Taur Matan Ruak, tersa ne’e partisipa iha serimónia rituál atu halo perfurasaun mina-matan Feto Kmaus no Liurai iha munisípiu Covalima. 

Notísia Relevante: ANPM aprova dokumentu “Safety Case”, Kompañia Timor Resources hala’o perfurasaun

Bazea ba ajenda hosi Autoridade Nasionál Petróleu no Minerál (ANPM) ne’e, perfurasaun mina-matan ne’e sei lansa hosi Primeiru-Ministru Taur Matan Ruak iha kuarta-feira (27/10) aban.

Primeiru-Ministru, Taur Matan Ruak to’o iha munisípiu Covalima iha 13h00 lorokraik. Deskansa uitoan, iha tuku 19h00, Xefe Governu partisipa serimónia rituál hodi hasa’e onra ba mártires no eroi sira iha Monumentu Memoriál Masakre Setembru Negro 1999. 

Antes hahú, lia-na’in sira tuur haleu biti ida-nia leten no  iha biti leten ne’e hatuur kohe no mama-malus fatin ne’ebé nakonu ho malus, bua no ahu.

Lia-na’in sira tuur haleu biti ida-nia leten, ne’ebé iha biti leten ne’e hatuur kohe no mama-malus fatin ne’ebé nakonu ho malus, bua no ahu. Imajen Tatoli/Celestina Teles.

Lia-na’in sira tuur hodi haree malus ho bua, hodi bolu Prezidente Konsellu Veteranu Riak Leman, tuur hamutuk ho lia-na’in sira hosi munisípiu 12 no RAEOA ne’e, sira tau liman hamutuk hafoin lia-na’in ida hamulak ba matebian no bei’ala sira.

“Ami tau liman no lian hodi kaer malus no bua, no hodi tau liman hamulak husu ba ita-nia eroi sira hotu, ita tetu hamutuk, halo ibun ida, lian ida hodi haforsa nó hakbesik sira-nia Lamak Dato ita hotu hamutuk,” Lia-Na’in Uma Metan Kasauk Bauk, Armindo Pereira, hamulak.

Serimónia rituál ne’e realiza hosi uma lisan Uma Metan Kasak Bauk ho nia lia-na’in Armindo Pereira, uma lisan Lusin Matai ho nia lia-na’in Lucio do Rego no lia-na’in Manuel Monteiro hosi uma lisan Uma Hun Lakeu.

Hafoin lia-na’in sira hamulak, lia-na’in sira oho fahi ida, hodi lori fahi nia raan ne’e hodi hisik haleu iha fatin lulik ne’e, hanesan lia-na’in sira hamulak hodi fó han ba matebian, bei’ala no eroi sira-nia klamar atu bele tulun ba atividade perfurasaun mina-matan ne’e bele la’o ho susesu.

Xefe Governu nia prezensa ne’e akompañadu hosi Ministru Petróleu no Rekursu Minerál, Victor da Conceição no Vise-Ministru Administrasaun Estatál, Lino Torrezão de Jesus. 

Tuir observasaun Agência Tatoli katak, iha serimónia rituál ne’ebè realiza iha monumentu Setembru Negro ne’e, partisipa hosi Primeiru-Ministru Taur Matan Ruak, Xefe Estadu Maior F-FDTL, Terente Jenerál Lere Anan Timor, Major Jenerál Falur Rate Laek, Ministru Petróleu no Minerál, Vise-Ministru Administrasauun Estatál, Prezidente Konsellu Veteranu, Komandante PNTL Munisípiu Covalima, Administradór no veteranu sira. 

Jornalista : Celestina Teles

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here