Diretór Jerál Desentralizasaun Administrativa Ministériu Administrasaun Estatál (DA-MAE), Belarmino Filomeno Neves, Imajen/Osória Marques.

BAUCAU, 26 outubru 2021 (TATOLI) – Governu liuhosi Ministériu Admistrasaun Estatal (MAE) husu entidade hotu iha munisípiu Baucau atu prepara-aan ba podér lokál no desentralizasaun administrativa no hasoru eleisaun munisipál iha futuru.

“Tenke rekoñese duni katak sira (Baucau) bele, tanba iha eventu no atividade barak mak sira realiza, seluk atu tama ba eleisaun munisipál ne’e tenke liuhosi avaliasaun kondisaun mínimu ne’ebé sei hala’o hosi grupu tékniku interministeriál katak avalia kompeténsia ne’ebé atribui ona dezde 2016, mínimu tenke prenxe valór 60, ha’u fiar katak Baucau-oan tenke serbisu hamutuk, sempre bele,” Reprezentante Ministru Administrasaun Estatal atuál Diretór Jerál Desentralizasaun Administrativa, Belarmino Filomeno Neves,  ko’alia iha Sentru Konvensaun Baucau (CCB, sigla Portugés), tersa ne’e.

Diretór Jerál MAE ko’alia asuntu ne’e relasiona ho projetu-lei kona-ba Podér Lokál no Desentralizasaun Administrativa aprova ona hosi Parlamentu Nasionál. Nune’e mós Lei Eleitorál Munisipál ne’ebé fó dalan atu iha eleisaun munisipál iha futuru. Projetu-lei rua ne’e hein de’it promulgasaun hosi Prezidente Repúblika, Francisco Guterres ‘Lú Olo’.

Nia husu autoridade munisipál atu serbisu hamutuk ho entidade hotuhotu iha munisípiu refere tenke kolabora malu hodi hamutuk hasai povu hosi kiak.

Nune’e mós kombate hamlaha no má-nutrisaun ne’ebé fó implikasaun ba komunidade ne’ebé laiha kbiit natoon atu ezerse sira-nia funsaun hodi hakonu nesesidade umana ne’ebé dignu.

Maibé bainhira lejizlasaun rua ne’e promulga hosi Prezidente Repúblika sei fó solusaun ba problema hirak-ne’e hotu tanba munisípiu sira jere rasik sira-nia orsamentu ho autonomia administrativa, finanseira no patrimoniál.

Notísia relevante: PN aprova projetu Lei Eleitorál Munisipál-Podér Lokál iha finál globál

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here