Imajen/Media PR.

DILI, 21 setembru 2021 (TATOLI)–Parlamentu Nasionál tersa ne’e aprova ona projetu Lei Eleitorál Munisipál, Podér Lokál no Desentralizasaun Administrativa iha finál globál.

Projetu lei númeru 5/V(2a) kona-ba Lei Eleitorál Munisipál aprovadu iha finál globál ho rezultadu votasaun a-favór 48, kontra 0 no abstensaun 4, no projetu lei númeru 6/V(2a) kona-ba Lei Podér Lokál no Desentralizasaun Administrativa aprovadu ho rezultadu votasaun a-favór 53, kontra 0 no abstensaun 0.

Notísia Relevante: Komisaun A aprova ona projetu-lei eleitorál munisipál iha espesialidade

“Nune’e, lei eleitorál, lei podér lokál no desentralizasaun administrativa aprovadu. Dala-ida tán ita marka istória ida ba podér lokál no desentralizasaun administrativu ne’ebé hetan mandatu hosi Konstituisaun RDTL. Ita hein ho aprovasaun ida-ne’e Prezidente Repúblika la veta maibé promulga, nune’e fó dalan ba ezekutivu implementa,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária.

Pakote lei rua ne’e Prezidente Parlamentu Nasionál sei enkamiña ba Prezidente Repúblika hodi foti desizaun promulga ka veta.

Projetu-Lei Eleitorál Munisipál iha kapítulu hamutuk VIII no artigu hamutuk 137 no projetu Lei Podér Lokál no Desentralizasaun Administrativa iha títulu hamutuk X no artigu hamutuk 190.

Projetu-lei eleitorál munisipál ne’e tanba ejizensia hosi Konstituisaun RDTL artigu 65 númeru 1, ne’ebé define órgaun eleitu ho soberania no eskolla liuhosi eleisaun, mediante sufrájiu universal, livre, diretu, sekretu, pesoál no periódiku.

Nune’e mós projetu-lei podér lokál no desentralizasaun administrativa ne’e konstitui ho pesoa koletiva iha territóriu nasionál ba órgaun reprezentativu sira-ne’ebé define organizasaun, kompeténsia, funsionamentu no kompozisaun define iha lei.

Projetu-lei eleitorál ne’e ko’alia refere liu bá órgaun podér lokál ne’ebé povu mak hili tantu asembleia munisipál no prezidente autoridade munisípiu sira.

Entretantu projetu-lei podér lokál ne’e atu hakbesik serbisu públiku sira hosi Estadu ba kraik ka atribui kompeténsia tomak ba munisípiu sira halo planu, programa no orsamentu rasik.

Projetu-lei desentralizasaun administrativa ne’e previstu atu Governu Sentrál halo transferénsia kompeténsia ka fó podér ba munisípiu sira no atribui kompeténsia balu ne’ebé durante ne’e seidauk fó ba Governu munisipál.

Jornalista : Evaristo Soares Martins

Editór      : Cancio Ximenes

1 KOMENTÁRIU

HAKEREK NO HATÁN

Please enter your comment!
Please enter your name here