Kondisaun estrada ligasaun postu administrativu Lolotoe, mai kapitál Maliana. Imajen TATOLI/Sérgio da Cruz.

BOBONARO, 26 outubru 2021 (TATOLI)— Komunidade munisípiu Bobonaro, husu Governu hadi’a estrada ligasaun entre postu administrativu Maliana ba Bobonaro no Lolotoe tanba ho kondisaun ne’ebé grave iha tempu udan.

Domingos de Fátima nu’udar komunidade Maliana, hateten iha tempu udan kondisaun estrada hahú hosi rotunda Maliana ba to’o Bobonaro grave tanba bee-sulin iha estrada laran nakonu halo tahu-dodok difikulta movimentasaun transporte públiku atu ultrapasa.

“Ha’u sente triste haree dezenvolvimentu iha kapitál munisípiu ida-ne’e, tanba ita-nia nasaun ukun-an tinan 21 ona mós estrada kontinua kuak, nakonu ho bee, fatuk-boot. Dalan ida-ne’e loloos ne’e la merese ona ita uza, tanba ne’e maoria ema Indonézia nia liman-fatin,” nia dada-lia ho Agência TATOLI, iha merkadu Maliana, tersa ne’e.

Nune’e mos komunidade postu administrativu Bobonaro, Adriano Talo Gomes, fó hanoin ba governu atu prioritiza estrada refere iha orsamentu 2022, tanba kondisaun estrada ne’ebé grave liu.

“Ami komunidade ne’e presiza liu mak estrada, eletrisidade no bee-moos, sé bainhira ita-nia kondisaun estrada kontinua aat, signifika afeta mós ba agrikultór sira-nia rendimentu no dalaruma produtu sira-ne’e soe estraga, tanba hosi Bobonaro atu lori mai merkadu Maliana tenke ultrapasa situasaun defísil, liuliu iha parte Halimesak no Oe-Leu. Kuandu udan ita liu la di’ak kedas, tanba rai-monu halo karreta anguna balu mós labele halai,” nia espresa.

Komunidade Bobonaro iha poténsia ba setór agrikultura hanesan batar, talas, fehuk, koto no seluk tán, enkuantu iha parte ortikultura mak modo-mutin, tomate, brinjela, liis no lakeru.

Nune’e mós iha setór pekuária, komunidade barakliu mak hakiak karau, fahi, bibi no manu, maibé produtu hirak-ne’e sei la folin bainhira kondisaun estrada kontinua sai prekupasaun boot.

Hosi parte setór turizmu nian hanesan bee-manas Marobo, bee-kores iha Karabau, ne’ebe bele atrai vizitane estrajeiru sira atu mai pasa feria iha fatin refere.

“Dalan ida atu tún ba bee-manas Marobo nia ne’e mós aat hotu ona, ida-ne’e governu bele fakar osan barak hadi’a uma no pixina sira mós ema labele mai tanba dalan ladi’ak, ne’e duni ha’u hanesan joven sujere ba governu bainhira atu investe iha setór importante sira, presija hadi’a uluk mak estrada,” nia fó hanoin ba governu.

Hatán ba preokupasaun ne’e, Administrador postu administrativu Maliana, Tomás Laca Loe, rekonñese diresaun estrada iha diresaun refere grave.

“Ha’u reprezenta komunidade Maliana, husu ba ita-nia nain ulun sira, presiza haree kondisaun estrada ne’e lalais, sé lae ita-nia agrikultór sira labele ona fa’an sira-nia produtu lokál iha merkadu tanba kestaun kondisaun estrada ne’e,” nia hateten.

Postu Administrativu Bobonaro, iha suku 18 ho totál populasaun tuir sensu uma-kain 2015 hamutuk 24,719 kompostu hosi mane 12,134 no feto 12,585 ho totál xefe família 4,467.

Nune’e mós Postu Administrativu Maliana, iha suku hitu (7) ho totál populasaun 28,908 kompostu hosi mane 14,538 no feto 14,370 ho totál xefe família 4,942.

Ekuantu Postu Administrativu Lolotoe, iha suku hitu (7) ho totál populasaun hamutuk 6,845 kompostu hosi mane 3,383 no feto 3,462 ho totál uma-kain 1,426. Entretantu gografikamente autorudade munisipál Bobonaro, ho luan hamutuk 1.368 km2.

Notísia relevante:Kondisaun estrada Oe-Leu iha tempu udan grave

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here