Kondisaun estrada iha área Hol-lak, suku Oe-Leu, postu administrativu Bobonaro/ Imajen Agência TATOLI/Sérgio da Cruz.

BOBONARO,14 outubro 2021 (TATOLI) — Kondisaun estrada iha área Hol-lak, suku Oe-Leu, postu administrativu Bobonaro, munisípiu Bobonaro grave iha tempu udan tanba movimentasaun transporte publiku defísil movimenta.

Tuir observasaun Agência TATOLI iha loron kinta ne’e maizumenus tuku 03:15 nota, kondisaun estrada ne’e nakonu ho tahu-dodok hafoin udan boot akontese iha tuku 02:12.

Nune’e mós iha tuku 04:02, komunidade sira-ne’ebé halo viajen ba-mai, hosi postu administrativu Maliana vila ba Bobonaro no Lolotoe defísil tebes atu ultrapasa.

Situasaun ne’e mós defísil liu ba karreta kamioneta no anguna sira bainhira movimenta liuhosi diresaun refere. Maske motorista sira haka’as veíkulu ho velosidade másimu maibé nafatin patina iha fatin tanba tahu dodok susar atu ultrapasa. Enkuantu bele ultrapasa bainhira komunidade sira kesi-tali ajuda dada karreta no motorizada sira.

Ho kondisaun estrada ne’ebé grave ne’e hamosu engrafamentu iha diresaun refere, obrigatóriu pasajeiru sira tenke hein kleur, balun hein to’o tahu-maran hafoin halo viajen.

Ho kondisaun ne’ebé grave ne’e, Xefe suku Oe-Leu, Januário Meta Tae Bragansa, fó-sai katak, situasaun ne’e akontese kada tinan, bainhira udan monu-rai.

“Bainbain tempu hanesan sei di’ak oituan, maibé tama ba jeneiru to’o marsu hanesan ne’e udan boot, anin mós boot, ne’e dalan sira-ne’e sai mota hotu, ema la’o-ain de’it mós susar la halimar, sá tán karreta ho motorizada atu liu,” nia informa ba Agência TATOLI, iha Bobonaro, kinta ne’e.

Nia haktuir, kuandu akontese udan boot, komunidade sira iha suku Oe-Leu mobiliza malu ba iha fatin ne’e hodi ajuda motorizada no karreta sira-ne’ebé patina iha área refere.

Xefe Suku Oe-Leu ne’e sempre aprezenta kondisaun estrada ne’e iha reuniaun nível munisipál no levanta beibeik ba governu, maibé to’o oras ne’e seidauk resposta.

Autoridade lokál ne’e subliña, kondisaun estrada iha ninia suku, hahu kedas iha área Ili-bole to’o aldeia Mologen barak mak ameasa atu kotu tanba kauza hosi rai-halai.

Nia husu ba Ministériu Obra Públika atu halo lalais intervensaun, tanba situasaun ne’e fó ameasa tebes ba ema-nia vida.

“Ha’u preokupa tebes, sé bele ita-nia Governu labele tau liu prioridade ba vasina, maibé presiza tau prioridade mós kona-ba estrada aat sira-ne’e, tanba ita dehan hadomi povu nusá estrada sira aat ameasa ba ema-nia vida mós, ita labele husik kondisaun estrada hanesan ne’e,” nia afirma

Situasaun ne’e la’ós  akontese de’it iha área suku Oeleu, maibé akontese mós iha área Halimesak, suku Odomau, postu administrativu Maliana, ne’ebé estrada nakonu ho tahu dodok.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here