Diretór Jerál SEFOPE, Paulo Alves. Imajen TATOLI/Francisco Sony.

DILI, 02 Agostu 2021 (TATOLI)—Diretór Jerál Sekretaria Estadu Formasaun Profisionál no Empregu (SEFOPE), Paulo Alves, informa dadaun ne’e SEFOPE hahú halo fali rejistrasaun foun ba timor-oan sira-ne’ebé hakarak tuir ezame lian korea nian, nune’e bele prepara bainhira ba servisu iha korea.

Notísia Relevante: Timoroan Rihun Lima Resin Tuir Teste Lian-Korea

“Agora dadauk SEFOPE servisu hamutuk ho reprezentante Ministériu Traballu Empregu Korea do Sul ninian, ita hahú halo fali inskrisaun foun ba timoroan sira-ne’ebé hakarak tuir fali ezame lian korea nian,” Paulo Alves, hateten ba jornalista sira, iha Sentru Nasionál Formasaun Profisionál (CNFP, sigla portugés) Becora, Dili, ohin.

Prosesu rejistrasaun ne’e sei la’o hela no tuir determinasaun data hosi servisu unidade empregu rai-li’ur nian ne’ebé fó sai tiha ona, hanesan bainhira prosesu rejistrasaun ramata, SEFOPE prepara de’it atu naran sira-ne’e haruka tiha ba Korea do Sul.

“Ita iha limitasaun ba komputadór ne’ebé iha, hanesan ita iha komputadór 30 de’it, hanesan kada loron kuaze ema barak mai rejistu. Iha esperiénsia liubá, ema 2000 ka 3000 mak mai rejistu no loron ida ita fahe ba turma tolu, entaun loron ida ema na’in-90 mak tenke tuir,” nia haktuir.

Iha prosesu ezame ne’e hala’o liuhosi online, hanesan bainhira sira tuir teste ona, Korea halo koresaun iha ne’ebá dentru minutu 15 bele hatene ona rezultadu pasa ka la pasa. Se la pasa, SEFOPE haruka fali alin sira-ne’e tuir fila-fali aula.

Totál dadus ne’ebé iha, hanesan foin dadaun depois iha pandemia COVID19 kuaze 2000 mak ativa hela formasaun no sira ne’e mak SEFOPE fó uluk prioridade tanbá sira aprende ona lian korea nian,” nia hateten.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here