Pesoál saúde tama-sai uma hodi fó vasina ba abitante iha suku sira iha Viqueque, tersa (26/10). Imajen TATOLI/Vitorino Lopes da Costa

VIQUEQUE, 26 outubru 2021 (TATOLI)Diretór Servisu Saúde munisípiu Viqueque, Francisco de Carvalho, hateten, inisiativa Governu liuhosi Ministériu Saúde (MS) lori vasina ba komunidade nia uma halo taxa partisipasaun iha munisípiu Viqueque aumenta.

“Daudaun pesoál saúde no ekipa ministériu kontinua halo sosialisaun kona-ba importánsia vasina no fó vasina iha postu lima. To’o ohin loron, ha’u nafatin orienta ekipa pesoál saúde ba terrenu hodi halo sosialisaun no fó vasina ba komunidade to’o área remota,” Diretór Servisu munisipál informa ba Agência TATOLI, iha ninia knaar fatin, Viqueque villa, tersa ne’e.

To’o loron 25 outubru, taxa partisipasaun vasina iha Viqueque ba doze dahuluk hamutuk ema 37.901 (54,9%) no doze daruak 23.624 (86,3%), hosi totál alvu 43.939, ne’ebé hanesan munisípiu ho taxa partisipasaun vasina boot daruak.

Notísia relevante: Covalima okupa fatin dahuluk progresu vasinasaun atinje 82,4%

Biban ne’e, Francisco de Carvalho husu abitante ho idade 18 ba leten atu simu vasina hodi salva-an hosi COVID-19.

Tuir Diretór ne’e, antes ne’e populasaun tauk simu vasina tanba rona informasaun la loos kona-ba vasina, maibé hafoin membru Governu sira tun direta hodi esplika kona-ba importánsia vasina, bele konvense abitante sira hodi simu vasina.

Tuir dadus, partisipasaun abitante ba vasina doze dahuluk iha postu Lacluta hamutuk 4.384 (36,9%) no doze daruak 2.318 (56,3%), postu Ossu doze dahuluk 8.104 (79,6%), doze daruak 5.598 (55%), no ema seidauk simu vasina hela 2.089 (20,4%).

Postu Uatucarbau doze dahuluk 3.434 (81,5%) no doze daruak 2.213 (52,5%) no ema seidauk vasina hela 779 (18,5%), postu Uatulari doze dahuluk 9.300 (86,3%), doze daruak 6.107 (56,7%) no ema seidauk simu vasina hela 1.475 (13,7%) no Viqueque Villa doze dahuluk 13.037 (88,9%), doze daruak 7.760 (52,9%) no ema seidauk vasina hela 1.626 (11,1%).

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here