Pesoal saúde prepara hela vasina AstraZeneca hodi fó abitante sira iha Sentru Saude Comoro, segunda (04/10). Imajen TATOLI/António Gonçalves

COVALIMA  16 outubru 2021 (TATOLI)–Diretór Servisu Saúde Munisípiu Covalima, Filipe Pereira Lemos, informa, kobertura vasinasaun iha Covalima atinje ona 82,4%, ne’ebé hanesan munisípiu ho progresu vasinasaun boot dahuluk, kompara ho munisípiu seluk inklui Rejiaun Administrativa Espesiál Oé-cusse Ambeno.

Progresu ne’e hatudu ema hamutuk 46.092 mak simu ona vasina, hosi doze vasina 64.414 ne’ebé distribui ona iha Administrasaun Covalima.

“Bazeia dadus hosi loron 14 abríl to’o 15  outubru, kobertura vasinasaun iha Covalima hosi postu administrativu hitu atinje ona 82,4%,” Diretór Servisu munisipál, Filipe Pereira Lemos, hateten ba Agência TATOLI, bainhira akompañia kampaña vasinasaun iha aldeia Dais, suku Belekasak, sábadu ne’e.

Notísia relevante: Partisipasaun membru Governu iha kampaña vasinasaun aumenta 17%

Tuir dadus, abitante elijível (tinan 18 ba leten) iha aldeia Dais, suku Belekasak hamutuk 253 mak simu ona vasina doze dahuluk no abitante hamutuk 51 mak simu ona doze kompletu.

Iha postu administrativu Fatumea kobertura vasina doze dahuluk 98,7% no doze daruak  90,1,%, Fatululik doze dahuluk  99,7% no doze daruak 79,5%, Tilomar doze dahuluk 90,8% no doze daruak 65,9%, Fohorem doze dahuluk 84,1% no doze daruak 66,5%, Maucatar doze dahuluk 86,3% no doze daruak 53,7%, Suai villa doze dahuluk 79,5% no doze daruak 48%, enkuantu ba postu Zumalai, kobertura vasina kiiik ho doze dahuluk 62% no doze daruak 36,9%.

Tuir Pereira Lemos, atu hasa’e kobertura vasina, pesoál saúde sira halo koordenasaun ho parte hotu hodi akompaña membru Governu sira hosi nasionál hodi halo sensibilizasaun ba komunidade kona-ba importánsia vasina iha ámbitu pandemia, ne’ebé hala’o iha postu administrativu hitu.

Iha biban hanesan, Xefe suku Belekasak, Leonito Gusmão, enkoraja komunidade atu simu vasina, líder komunitáriu sira se serbisu hamutuk ho pesoál saúde sira atu buka tuir abitante ne’ebé seidauk vasina. 

“Ha’u sei buka abitante atu husu sira razaun lakoi vasina, nune’e bele partisipa másimu kampaña nasionál imunizasaun iha sentru saúde sira,” nia akresenta. 

To’o loron 15 outubru, iha territóriu tomak, rejista ona ema 504.194 (66,8%) mak simu ona vasina doze dahuluk no ema 322.439 (42,7%) mak simu ona vasina doze daruak, ho totál kobertura 826.634.

Jornalista : Celestina Teles

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here