Vise-Ministru Adiministrasaun Estatál (MAE), Lino de Jesus Torrezão, sensibiliza planu dezenvolvimentu suku ba komunidade, iha sede suku Babulu, segunda (25/10). Imajen TATOLI/Vitorino Lopes da Costa

VIQUEQUE, 25 outubru 2021 (TATOLI)—Vise-Ministru Adiministrasaun Estatál (MAE), Lino de Jesus Torrezão, halo sensibliza kona-ba progresu dezenvolvimentu liuhosi programa nível munisipál iha suku Babulu, postu Uatulari, Munisípiu Viqueque.

“Objetivu ha’u mai vizita suku Babulu atu ko’alia ho konsellu suku Babulu nian kona-ba dezenvolvimentu ne’ebé agora la’o maka’as, iha suku Babulu liuliu programa Planu Nasionál Dezenvolvimentu Suku (PNDS) hanesan Uma Kbiit Laek (UKL) ne’ebé agora dadaun la’o hela, hodi partilla informasaun ba komumidade,” Vise-Ministru Administrasaun Estatál hateten ba Agência TATOLI, iha sede suku Babulu, segunda ne’e.

Notísia relevante: PNDS implementa ona projetu 973 iha territóriu nasionál

Governante ne’e dehan, programa UKL ne’ebé durante ne’e implementa ona iha suku sira, benefisia ona abitante kbiit laek sira.

“Uma Kbiit Laek ita la haree ba kor, maibé ita haree liu ba populasaun sira nia kondisaun moris,” nia akresenta.

Iha biban hanesan, Vise-Ministru sensibiliza mós kona-ba dezentralizasaun administrativa ba komunidade, liuliu loke suku foun sira.

“Ha’u hateten klaru ba komunidade katak atu reativa suku no loke suku foun ne’e tenki prienxe rekezitu, tenki iha ema rihun tolu ba leten mak foin forma suku ida, tenki iha istória reativa suku no loke suku foun. Ida-ne’e mós ita sei haree di’ak sira-nia proposta, la’ós simu loos de’it sira nia proposta atu retiva suku no loke suku foun, ami sei haree filafali no orienta tékniku sira tun direta hodi halo levantamentu dadus,” governante ne’e esplika.

Iha biban hanesan, Xefe suku Babulu, Mario Trindade, agradese tanba membru governu ida bele marka prezensa iha suku hodi haree progresu dezenvolvimentu.

“Agradese ba Vise-Ministru bele hakat mai ami-nia suku, maski kondisaun estrada difikulta tebes movimentu,” nia dehan.

Atividade ne’e partisipa hosi populasaun suku Babulu, autoridade suku, veteranu, profesor no estudante.

Iha tinan 2021, Governu implementa projetu PNDS hamutuk 973 iha territóriu nasionál, hosi totál projetu hamutuk 1.818.

Iha sorin seluk Governu sei harii UKL hamutuk 1.254 iha suku 424, ho totál alokasaun orsamentu hosi tinan 2021 hamutuk millaun $25, enkuantu kustu ba kada uma entre $14.000 to’o $17.000.

Uma ne’ebé konstrui kompostu hosi tipu ka medida rua hanesan, tipu 48 m2 iha kuartu tolu, sala vizita ida no dapur, tipu 37 m2 kuartu rua, kompletu ho sala vizita ho kuziña.

Konstrusaun UKL ho objetivu korresponde ho Planu Estratéjiku Dezenvolvimentu Nasionál (PEDN) 2011-2030, ne’ebé rekoñese povu Timor-Leste nia aspirasaun atu harii nasaun ne’ebé forte, prósperu no moris di’ak.

Ba tinan 2022, alokasaun orsamentu ba PNDS ba Viqueque $270.000, enkuantu alokasaun ba UKL hamutuk $265.870.

PNDS konsidera nu’udar programa regular ne’ebé ninia implemenatasaun iha nível suku, ne’ebé iha tinan 2022, programa ne’e hetan alokasaun orsamentu hamutuk millaun $8,2 no hosi totál ne’e, aloka ba atividade fiziku hamutuk millaun $7 no atividade operasionál millaun $1,5, ne’ebé sei benefisia suku 207.

UKL konsidera nu’udar programa ne’ebé ninia orientasaun atu kria kondisaun komunidade kbiit laek sira iha nível aldeia, ne’ebé iha tinan 2022, programa ne’e hetan alokasaun orsamentu hamutuk millaun $12,8, hosi totál ne’e, aloka ba atividade fíziku hamutuk millaun $12,3 no atividade operasionál ba suku 241.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here