Diretora Programa Nasionál Dezenvolvimentu Suku (PNDS), Claudina Soares Pinto. Imajen TATOLI/Osória Marques.

DILI, 25 agostu 2021 (TATOLI)—Diretora Sekretariadu Tékniku Programa Nasionál Dezenvolvimentu Suku (ST-PNDS), Claudina Soares Pinto, informa PNDS implementa ona projetu 973 iha territóriu nasionál hosi totál projetu hamutuk 1.818.

“Ita-nia projetu ne’ebé la’o ona mak 973 no seidauk la’o ne’e mak hamutuk 845. Hosi totál projetu iha territóriu Timor-Leste iha 1.818, ne’e inklui ho konstrusaun Uma Kbiit Laek, reabilitasaun sede suku no mós atividade PNDS regular sira,” Diretora PNDS hateten ba Agência TATOLI, iha nia knaar fatin Colmera, Dili, kuarta ne’e.

Iha Munisípiu Bobonaro, nia informa, projetu 150 mak seidauk implementa, iha Ermera projetu 138, RAEOA iha projetu 41 no mós iha Munisípiu Baucau iha projetu lubuk ida mak seidauk implementa inklui munisípiu seluk mós projetu balun seidauk finaliza.

Tuir nia, projetu balun seidauk implementa tanba pandemia COVID-19 ne’ebé Governu implementa serka sanitária no jeografikamente iha suku balun estrada aat entaun projetu sira-ne’e labele implementa ho di’ak.

Maibé, nia dehan, sira-nia parte mós koko ona ko’alia ho ekipa PNDS iha munisípiu sira atu koordena no buka estratéjia, nune’’e ekipa PNDS tenke implementa projetu sira-ne’e iha baze.

“Ami-nia konsentrasaun ba suku ne’ebé mak asesu ba estrada. Bainhira Institutu Jerál Estadu (IGE, sigla portugés) konklui hotu ona nia servisu hanesan hadi’a estrada mak ami-nia ekipa hahú implementa projetu sira-ne’e. Ami husu nafatin IGE atu kontinua ajuda ami, nune’e ami bele aselera atividade PNDS regular nian iha suku sira,” nia dehan.

Maske tarde, nia garante sei buka estratéjia hodi tuur hamutuk ho ekipa atu oinsá mak bele konklui projetu sira-ne’e, tanba PNDS nia preokupasaun prinsipál mak iklima ne’e tanba bainhira udan monu rai ne’e, sira-nia parte labele halo buat ida tanba labele halo mobilizasaun ba materiál konstrusaun hodi konstrui uma ba ema kbiit laek sira iha área rurál.

“Ida-ne’e mak sai obstakulu ba ami. Maibé, ami fiar katak fatin ne’ebé mak identifika udan ne’e mak hela pursentu ki’ik no seluk ne’e kontinua la’o hela,” nia dehan.

Tinan ne’e, PNDS implementa atividade tolu mak atividade Uma Kbiit Laek (UKL), kontinua halo reabilitasaun sede suku no mós atividade PNDS regular sira hanesan infraestrutura bázika ne’ebé responde ba populasaun nia ejizénsia ka preokupasaun sira hanesan sistema bee-moos, drainajen, no seluk tan.

Jornalista : Osória Marques 

Editór       : Cancio Ximenes

HAKEREK NO HATÁN

Please enter your comment!
Please enter your name here