Portavós Kandidatu Funsionáriu na’in-93, Adelino Pires (klaran). Imajen Tatoli/Nelson de Sousa.

DILI, 25 outubru 2021 (TATOLI)—Kandidatu ajente administrasaun públika na’in-93 ne’ebé pasa iha vaga tinan 2019 ho nível III to’o V, segunda ne’e husu ba Komisaun G ne’ebé trata asuntu Edukasaun, Juventude, Kultura no Sidadania atu halo fiskalizasaun ba prosesu rekrutamentu iha Ministéiru Edukasaun Juventude no Desportu (MEJD).

Notísia Relevante: Kandidatu funsionáriu kontratadu 93 husu MEJD prosesa kontratu

“Ami husu ba PN liu-liu Komisaun G atu halo fiskalizasaun ba prosesu rekrutamentu iha MEJD ne’ebé finaliza iha 2019 ne’e. Ami na’in-93 antes pasa iha konkrsu finál maibé to’o agora seidauk efetivu servisu, ne’ebé ohin loron abandona hela, maske prosesu rekrutamentu finaliza desde iha 2019 liu-bá,” Portavós Kandidatu Funsionáriu na’in-93, Adelino Pires, hateten ba jornalista sira iha resintu Parlamentu Nasionál.

Prosesu ne’e ekipa sira-ne’ebé halo rekrutamentu mak Komisaun Funsaun Públika (KFP) ho koordenasaun MEJD nian loké konkursu no eis funsionáriu ne’ebé iha ministra sesante hapara mós kompete fali.

Kandidatu funsionáriu sira konsidera ministériu la fó valór no la konsidera sira-nia direitu nu’udar sidadaun timorense ka nu’udar timor-oan.

Biban ne’e, sira rekomenda ba Komisaun G atu halo fizkalizasaun tanba iha 2020 ne’e, MEJD projeta mós proposta Orsamentu Jerál Estadu (OJE) 2020 ne’ebé temi mós rekrutamentu funsionáriu na’in-93, maske OJE aprova maibé kontinua abandona.

“Ministru dehan prosesu ne’e irregularidade maibé ami lahatene no vítima nu’udar sidadaun timor-oan,” nia dehan.

Preokupasaun ne’e, kandidatu funsionáriu sira-ne’e atu halo audénsia ho membru Governu tutela maibé okupadu ho servisu seluk.

Prezidente Komisaun G, Deputadu, António Verdiál, promete sei hato’o preokupasaun hirak ne’e ba ministéiru relevante hodi buka solusaun.

Antes ne’e, Komisaun G halo ona audiénsia ho parte ministériu relevante no iha resposta tempu besik la determina tempu hodi buka solusaun, nune’e komisaun sei la taka matan ba preokupasaun ne’e.

Tui nia, iha informasaun ne’ebé fó sai hosi Konsellu Ministru (KM) laiha objesaun ba ajente administrativu na’in-93.

Antes ne’e, Ministru Edukasaun Juventude no Desportu (MEJD), Armindo Maia, hateten daudaun ne’e ministériu serbisu maka’as atu finaliza rezolusaun hodi aprezenta ba Konsellu Ministru atu foti desizaun ba funsionáru kontratadu 93 ne’ebé to’o ohin loron seiduk serbisu.

 Iha tinan 2019, funsionáriu na’in 200-resin ne’ebé MEJD hapara kontratu no deside loké fila-fali konkursu públiku, nune’e hosi funsionáriu sira-ne’e konkore fali no iha kandidatu 93 mak pasa, maibé lori tempu naruk ona kandidatura sira-ne’e MEJD seidauk bolu hala’o servisu to’o hin loron.

Jornalista : Nelson de Sousa

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here