Kandidatu ajente administrasaun públika na’in-93 halo konferénsia impresa, iha jardín 5 de Maio, Dili, kinta (03/03). Imajen/Florêncio Miranda Ximenes

DILI, 03 marsu 2021 (TATOLI)Kandidatu ajente administrasaun públika na’in-93 ne’ebé pasa iha vaga tinan 2019 ho nível III to’o V, husu Ministru Edukasaun, Juventude no Desportu  (MEJD), Armindo prosesa lalais kontratu atubele hala’o serbisu.

“Ami ezije ba Ministru Edukasaun, Juventude no Desportu atu prosesu lalais ami hanesan kandidatu ajente administrasaun públika na’in-93 nia kontratu, hodi labele dezvaloriza ami-nia direitu iha rai ida-ne’e,” Portavós kandidatu Ajente Administrasaun Públika MEJD, Adelino ‘Halesma’ Pires, hataten liuhosi konferénsia imprensa iha Jardín 5 de Maio, Farol,5 Dili, kuarta ne’e.

Portavós ne’e informa, vaga ne’ebé loke hosi MEJD iha tinan 2019, fó oportunidade ba timor-oan hotu atu tuir no iha altura prosesu rekrutamentu ne’e, Komisaun Funsaun Públika (KFP) mós hola parte atu garante kualidade, imparsiál no independente.

Tanba ne’e, kandidatu sira husu ba instituisaun relevante, liuliu KFP atu akompaña prosesu ida-ne’e to’o rohan.

“Ohin loron ita hotu nia luta mak halakon diskiriminasaun no injustisa sosiál. Nune’e husu ba Prezidente Republika, Parlamentu Nasionál, Governu no Tribunál atu haree lisuk problema ida ne’e,” nia akresenta.

Nia husu ba Konsellu Ministru, karik MEJD aprezenta projetu rezolusaun, bainhira atu foti desizaun tenke a-favór ba sidadaun nia direitu.

Alende ne’e, Portavós husu mós ba líder polítiku sira ne’ebé iha futuru atu ba lidera instituisaun Estadu, labele politiza instituisaun sira.

Biban ne’e, Adelino hato’o sentidu kondolénsia ba nia kolega Jacinto Gusmão nia família.

Jacinto Gusmão nu’udar portavós ba kandidatu Ajente Administrasaun Públika, ne’ebé organiza kolega 93 hodi ejize direitu ne’ebé pendente hosi MEJD.

“Ami hakarak hato’o sentidu kondolénsia profunda ba kolega Jacinto Gusmao ‘Lorico’ ne’ebé fila hikas ba Aman Maromak nia kadunan santu iha loron 18 fevereiru 2021,” nia dehan.

Jacinto Gusmão ‘Loroco’ nu’udar membru juventude OJETIL ne’ebé iha tempu rezisténsia, hamriik iha liña frente hodi hakilar ba Timor Leste nia independénsia.

Nia lamenta, ema ne’ebé uluk fó an ba mate, bainhira konkorre vaga no pasa ona iha MEJD, maibé seidauk serbisu to’o mate.

“Prosesu rekrutamentu ne’e finaliza ona, maibé MEJD pendente ami-nia kontratu, Aman Maromak diside hakotu kolega Lorico nia peregrinasaun iha mundu ida-ne’e,” nia lamenta.

Iha sorin seluk, Ministru Edukasaun Juventude no Desportu (MEJD), Armindo Maia, hateten daudaun ministériu serbisu maka’as atu finaliza rezolusaun hodi aprezenta ba Konsellu Ministru atu foti desizaun ba funsionáru kontratadu 93 ne’ebé to’o ohin loron seiduk serbisu.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here