KRAM-TL halo re-ajustamentu ba estrutura Organizasaun IKS, PSHT, KORKA iha RAEOA. Imajen Tatoli/Abílio Elo Nini.

OÉ-CUSSE, 23 outubru 2021 (TATOLI)—Komisaun Reguladóra Arte Marsiál (KRAM) Timor-Leste liuhosi Sekretáriu Estadu Juventude no Desportu (SEJD), sábadu ne’e realiza enkontru ho responsavél organizasuan arte marsiál IKSPTL, PSHT no KORKA atu re-ajusta lista membru organizasaun sira ba Governu.

Notísia Relevante: PSHT kompleta ona rekezitu hosi KRAM

“Prezensa KRAM iha Oé-Cusse atu diskute ajenda tolu importante ba organizasaun arte marsiál mak halo re-ajustamentu ba estrutura sub-KRAM iha RAEOA, halo atividade dialogu ho komunidade no organizasaun arte marsiál sira iha suku inklui eskola sira no halo kontaktu direta liuhosi atividade fiskalizasaun, nune’e bele hetan legalidade hodi garante estabilidade no pás hodi kontribui ba dezenvolvimentu nasionál,” Prezidente KRAM Timor-Leste, Octavio da Conçeição, informa ba jornalista sira iha salaun edukasaun Santa Rosa, Oé-Cusse.  

Nune’e mós, KRAM halo enkontru ho organizasaaun arte-marsiál tolu ne’ebé naran indika iha rezolusaun Governu númeru 4/2020 hanesan PSHT, KORKA no IKSPTL, atu esplika kona-ba prosesu kresimentu krietéria sira-ne’ebé mak KRAM fó sai inklui esplika prosesu re-rejistu no re-eatulizasaun dadus organizasaun arte marsiál nian.

“Estrutura sub-KRAM sira nomós komisaun arte marsiál no entidade iha RAEOA, presiza hametin liña komunikasaun hosi nivél aldeia to’o munisípiu, presiza konsulta entre parte organizasaun hotu-hotu, nune’e bele garante informasaun sira-ne’ebé produtivu bele asegura seguransa no pás iha Oé-Cusse,” nia hateten.

Prezidente KRAM ne’e fundamenta, organizasaun arte marsiál hanesan kualidade desportu, prosesu ne’ebé akontese iha kada organizasaun ida-idak, ne’e mekanizmu internál tuir sira-nia estatutu no rejimentu organizasaun nian kona-ba lala’ok implementasaun sira iha internál organizasaun nian.

KRAM nia papél importante mak halo lei hodi regula, halo lei hodi kontrola no halo lei hodi kondena liuhosi aplikasaun koima administrativa sira-ne’ebé mak sei aplika iha futuru.

Nia dehan, SEJD mai ho politika-rua mak foinsa’e mileniál nu’udar forsa kreátiva no re-integra organizasaun arte marsiál sira ba sosiedade no enkuadra sira ba modalidade desportu.

Arte-marsiál ne’e nu’udar modalidade desportu, presiza investimentu hosi instituisaun Estadu, nune’e bele re-organiza fali sira-nia organizasaun sai organizasaun desportu ne’ebé profisionál hodi bele kompete iha atividade desportu nivél suku, sub-rejiaun, munisípiu, nasionál to’o internasionál.

Iha tinan barak membru organizasaun barak atravesa fronteira sa’e sintu iha nasaun viziñu, entaun Governu hahú prepara kondisaun hanesan prosedimentu rejistu, daudaun Governu liuhosi Sekretáriu Estadu Juventude no Desportu liuhosi KRAM, hahú daudaun atu fó resposta ba kondisaun sira-ne’ebé mak organizasaun arte-marsiál sira iha.

Iha prosesu ne’e tomak, Governu sei halo koordenasaun interministériál liuhosi MNEK nomós embaixada Indonézia iha Timor-Leste, nune’e iha futuru organizasaun rejista no hetan ona legalidade, entaun serimónia sa’e sintu bele realiza ona iha rai laran.

Prezidente sub-KRAM RAEOA, Jeferino da Crus Salu, agradese ba koordenadór organizasaun arte marsiál sira iha Oé-Cusse tanba durante tinan barak ona, iha Oé-Cusse laiha akontesimentu grave kona-ba asalta malu entre membru organizasaun arte-marsiál sira.

Nune’e, nia husu nafatin atu motiva no fó edukasaun sivíka ba membru sira, nune’e bele garante estabilidade no pás iha Oé-Cusse hodi kontribui ba dezenvolvimentu nasionál.

Entretantu, partisipa iha enkontru ne’e mai hosi servisu edukasaun RAEOA, Sentru Juventude Rejiaun Oé-Cusse, Dirasaun Rejistu Sivíl Notariadu RAEOA, hamutuk estrutura no membru sira hosi organisaun PSHT, IKS no KORKA.

Jornalista : Abílio Elo Nini

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here