Kongresu Ekstraordináriu PSHT iha salaun Timor Lodge, Comoro, Dili, sabadu (31/07). Imajen Tatoli/Francisco Sony.

DILI, 31 Jullu 2021 (TATOLI)–Organizasaun Persaudaraan Setia Hati Terate (PSHT) kompleta ona rekezitu hosi Komisaun Regulladora Arte Marsial (KRAM), nune’e bele ba rejistu iha notariadu atu organizasaun ne’e bele iha direitu absolutamente hodi hala’o atividade legal iha Timor-Leste.

Notísia Relevante: Lere husu membru PSHT hametin estabilidade no pás

Prezidente PSHT iha Timor-Leste, Baltazar Lemos Seixas, Imajen Tatoli/Francisco Sony.

“Antes ne’e, KRAM husu ba organizasaun tolu ne’ebé antes ne’e Governu taka iha 2011 hanesan PSHT, Kera Sakti (IKS) no Kmanek Oan Rai Klaran (KORK) atu prenxe rekezitu hamutuk 17 mak bele ba rejistu iha notariadu atu sai hanesan organizasaun ne’ebé legal iha Timor-Leste. Agora PSHT kumpre ona rekezitu 16 seluk no ohin iha salaun Timor Lodge Dili, organizasaun ne’e realize kongresu nasionál ida hodi kompleta rekezitu 17 ne’ebé KRAM husu,” Prezidente PSHT Timor-Leste, Baltazar Lemos Soares, hateten ba jornalista sira iha salaun Timor Lodge, Comoro, Dili, sábadu ne’e.

Iha Kongresu ne’e atu hametin de’it estrutura anteriór no diskute ba regulamentu interna balun hodi halo aaprovasaun, no kongresu ne’e atu kompleta saida mak Sekretaria Estadu Juventude no Desportu (SEJD) liu hosi KRAM husu.

“Ami nia kongresu ne’e atu hametin ami-nia fraternidade iha organizasaun, atu kompleta mós rekejitu ne’ebé KRAM husu hodi re-ativa fali ami-nia organizasaun iha Timor-Leste,” Prezidente PSHT ne’e hateten.

Esperansa PSHT nian ba futuru mak atu hanorin ema sai ema no dedikasaun di’ak ba nasaun no jerasaun sira tuir mai.

Sekretáriu Estadu Juventude no Desportu (SEJD), Abrão Saldanha hatete bainhira Governu hasai rezolusaun re-ativa arte marsiál sira servisu másimu ho líder arte marsial hotu.

“Antes ne’e ami servisu hamutuk ho lider arte marsial sira hotu, hanesan PSHT, IKS no KORK no sira hotu konkorda ba rekejitu 17 ne’ebé ami hasai. PSHT nian hela ida de’it mak seidauk kompleta no ohin sira kompleta ona. Ba oin, ita haree, nune’e bele re-ativa sira-nia atividade. Maibé, ami rekomenda lai ba Ministeriu Justisa hodi husu loos hotu ona bele halao atividade,”  Abrão Salsinha hateten.

Rekezitu 17 ne’e mak hanesan akta asemblea jeral ne’ebé aprova hosi kongresu, rezistu membru, rezistu lideransa, fatin treinamentu, estatutu organizasaun no seluk tan.

Kongresu ne’e hala’o durante loron ida-ne’e, partisipa hosi Primeiru-Ministru Taur Matan Ruak, Tanente Jenerál Lere Anan Timur, Prezidente Konsellu Veteranu Riak Leman no membru PSHT iha territoriu nasionál no loke direta kongresu ne’e hosi Primeiru-Ministru Taur Matan Ruak.

Tuir dadus, daudaun ne’e total membru PSHT iha Timor-Leste hamutuk rihun 50-resin.

Jornalista  : Hortencio Sanchez

Editór       : Cancio Ximenes

HAKEREK NO HATÁN

Please enter your comment!
Please enter your name here