Autoridade lokál, estudante no profesór sira iha Zumalai, rona hela esplikasaun kosi Vise-MEJD António Guterres kona-ba importánsia vasinasaun. Imajen Tatoli/Celestina Teles.

COVALIMA, 22 outubru 2021 (TATOLI)—Vise Ministru Edukasaun Juventude no Desportu, António Guterres, sesta ne’e ensera kampaña vasinasaun iha postu administrativu Zumalai, munisípiu Covalima. 

Notísia Relevante: Tempu besik, labarik idade 12-17 iha Covalima sei simu vasina

“Ha’u deside mai vizita eskola ida-ne’e no ensera kampañã vasinasaun, tanba aban (sábadu, 23 outubru) ha’u fila ona ba Dili. Ha’u iha ne’e besik semana tolu ona hamutuk ho povu Covalima atu tulun hodi halo prevensaun ba COVID-19. Ita halibur malu iha ne’e tanba hanesan ita-nia domin ba malu no ita hakarak kuidadu malu hosi moras COVID-19,” António Guterres hateten liuhosi nia diskursu hodi ensera programa Kampaña Nasionál Vasinasaun iha Zumalai, Covalima.

Nia dehan, liuhosi reuniaun Konsellu Ministru orienta membru Governu na’in-tolu destaka mai iha munisípiu Covalima mak Vise-Ministru Edukasaun Juventude no Desportu realiza kampaña vasinasaun iha postu administrativu Fohorem no Maucatar,Vise-Ministru Interiór iha postu administrativu Fatululik, Fatumea no Tilomar, Ministru Obra Publikas iha postu administrativu Suai Vila no postu administrativu Zumalai.  

Vise-MEJD agradese ba líder komunitária sira ne’ebé hamutuk hodi disemina informasaun kona-ba importánsia hosi vasinasaun, nune’e líder komunitária sira bele fahe tutan informasaun ba komunidade atu labele fiar informasaun falsu hosi li’ur. 

Sekretáriu Administradór Munisípiu Covalima, Francisco Alves agradese ba Vise-Ministru Edukasaun Juventude nia prezensa iha munisípiu Covalima nia prezensa, tanba taxa kobertura vasinasaun iha munisípiu Covalima iha nivel nasionál okupa primeiru lugar. 

“Membru Governu nia prezensa iha ne’e, ho sira nia misaun atu realiza kampaña vasinasaun hodi kombate moras COVID-19. Tanba, ita-nia inan-aman sira rona informasaun falsu iha li’ur katak vasina ne’e ladi’ak bae ma-nia sa’ude,” nia hateten. 

Molok membru Governu nia prezensa iha Covalima, taxa kobertura vasinasaun foin atinje 60% maibé ho membru Governu nia prezensa, taxa kobertura vasinasaun sa’e no lori Covalima okupa promeiru lugar iha nivel nasionál ne’e atinje ona 85,7%.

Tuir observasaun, ho prezensa Vise-MEJD nia iha munisípiuu Covalima to’o iha aldeia sira ne’e, komunidade rona esplikasaun kona-ba vasinasaun ne’e, sidadaun sira mós antuziasmu hodi simu vasina. 

Jornalista : Celestina Teles

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here