Estudante Eskola Bázika Sentrál Farol bainhira atu ba tuir prosesu aprendizajen, segunda (18/10/2021). Imajen Tatoli/Antonio Gonçalves.

COVALIMA, 18 outubru 2021 (TATOLI)—Vise-Ministru Edukasaun Juventude no Desportu, António Guterres, informa iha tempu besik Ministériu Saúde sei lansa vasina Pfizer no estudante idade 12 to’o 17 iha Covalima sei simu vasina, tanba ne’e husu ba inan-aman sira tenke kolabora. 

Notísia Relevante: Vasina Pfizer doze 100.620 hosi EUA to’o iha Dili

“Iha tempuu besik, ita komesa vasina ba ita-nia oan sira-ne’ebè ho idade 12 to’o tinan 17. Husu ba inan-aman sira atu enkoraja oan sira atu simu vasina,” António Guterres hateten ba Agência Tatoli, iha Suku Belekasak, Aldeia Busadao, Covalima, segunda ne’e. 

Nia dehan, semana oin hahú halo ona lansamentu ba Vasina Pfizer doze dahuluk hodi fó vasina ba estudante sira, nune’e bele hasa’e sira-nia imunidade.  

“Ha’u-nia mensajen ba hotu-hotu, husu ita atu kolabora malu no fiar ita-nia médiku no autoridade lokál sira hodi konvense malu tenke vasina, ida-ne’e mak ha’u-nia hakarak,” nia apela.

Governante ne’e husu ba inan-aman sira atu motiva oan sira, nune’e labarik hotu bele simu vasina tanba liuhosi vasina ida-ne’e mak bele aumenta labarik sira-nia imunidade hodi kontra COVID-19 iha Timor-Leste.

Koordenadór Eskola Bázika Filiál (EBF) Busadao, Lourenço Gusmão, hateten estudante iha EBF Busadao prontu atu simu vasina. 

“Antes ne’e, ami informa ona ba estudante sira-ne’ebè mak kompleta ona idade 12  no sira mós prontu atu simu vasina,” nia dehan. 

Estudante iha EBF Busadao ho totál hamutuk 65 no hosi númeru ne’e, estudante na’in-13 mak atinje ona idade 12 atu simu vasina Pfizer.

Enkuantu Vasina Pfizer to’o ona Iha Timor-Leste iha loron 16 fulan ne’e, ne’ebè oferese hosi Estadu Unidu Amérika (EUA) liuhosi COVAX  ho koordenasaun United Nations Children’s Fund (UNICEF).

Vasina Pfizer ba dahuluk uza iha Timor-Leste no sei destina ba ema ho idade 12 to’o 17, ne’ebé tuir planu sei implementa doze dahuluk iha Dili iha loron 25 outubru, ba estudante no la’ós estudante hamutuk 41.000.

Notísia Relevante: 25 outubru, MS lansa vasina Pfizer doze dahuluk

Jornalista : Celestina Teles

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here