Diretór Ezekutivu TIC Timor, I.P, Roberto Caetano de Sousa Vicente, troka nota entendimentu ho Prezidente Konsellu Administrasaun RTTL, E.P, José António Belo ‘Taraleu’, iha área informasaun komunikasaun no teknolójia, iha salaun PCM, Palásiu Governu, sesta (22/10). Imajen TATOLI/Francisco Sony.

DILI, 22 outubru 2021 (TATOLI)—Agência Tecnologia da Informação e Comunicação (TIC) Timor I.P asina nota entendimentu ho Rádiu Televizaun Timor-Leste, Empreza Públika (RTTL, E.P), iha sesta ne’e, iha área serbisu teknolojia informasaun no komunikasaun.

Diretór Ezekutivu TIC Timor, I.P, Roberto Caetano de Sousa Vicente, hateten, entendimentu ne’e marka istória foun ida iha esforsu alkansa programa VIII Governu hanesan Governu Eletróniku ka E-Government.

Diretór Ezekutivu TIC Timor, I.P, Roberto Caetano de Sousa Vicente, asina nota entendimentu ho Prezidente Konsellu Administrasaun RTTL, E.P, José António Belo ‘Taraleu’, iha salaun PCM, Palásiu Governu, sesta (22/10). Imajen TATOLI/Francisco Sony

“Nota entendimentu ne’e fahe ba komponente lima atu fornese servisu informasaun teknolojia no komunikasaun hanesan Internet Protocol (IP) Address ka sistema portál website, servisu email ofisiál ne’ebé fornese servisu hotu, servisu konetividade intranet no internet ba RTTL, E.P, apoiu tékniku jornalista destakadu iha munisípiu 12, no apoiu tékniku ba fornese konektividade ba jornalista ne’ebé halo kobertura ba kampãna Prezidensiál iha munisípiu 12 atu hato’o informasaun,” Diretór Ezekutivu TIC Timor, I.P hateten liuhosi ninia diskursu, iha salaun Prezidénsia Konsellu Ministru (PCM, sigla portugés), Palásiu Governu.

Notísia relevante: TIC Timor I.P sei asegura serbisu eletróniku SAMES

Objetivu realiza inisiativa ne’e, tanba TIC Timor hanesan instituisaun públika ne’ebé harii bazeia ba dekretu lei númeru 29/2017 iha loron 02 agostu 2017 no tutela ba Primeiru-Ministru ho baze atu dezenvolve di’ak liután setór informasaun, komunikasaun no teknolojia hodi hafasil servisu ho kualidade di’ak ba sosiedade.

Diretór Ezekutivu TIC Timor I.P, Roberto Caetano de Sousa Vicente. Imajen TATOLI/Francisco Sony

“Liuhosi nota entendementu ne’e bele eleva sosiedade sira-nia koñesementu no sei promove dezenvolvimentu sósiu ekonómiku, diversifikasaun ekonomia, bein-estar no mós kualidade moris sidadaun, ne’ebé transmite liuhosi RTTL,E.P hanesan fonte informasaun ne’ebé importante tebes ba ema hotu inklui komunidade iha munisípiu ka iha Timór laran tomak no estranjeiru liuhosi mídia online sira, ne’ebé iha kooperasaun servisu teknolojia.

Diretór Ezekutivu konsidera, institutu públiku ne’e importante tebes ba papél RTTLE.P, nune’e sei dezenvolve tuir nesesidade empreza estatál iha kurtu, médiu no longu prazu hodi fasilita di’ak liután prestasaun servisu ba komunidade iha nível rurál no nasionál.

“TIC TIMOR bele transforma servisu RTTL E.P. mais elektróniku liuhosi utilizasaun servisu teknolojia, informasaun no komunikasaun,” nia subliña.

Nune’e mós, liuhosi kolaborasaun ne’e sei kontribui ba esforsu hamenus gastu la nesesáriu iha área informatika, sentraliza, asegura dokumentu no informasaun iha sentru dadus Governu elektróniku, fasilita asesu ba padraun teknolojia no aplikasaun ne’ebé modernu, seguru, atualizadu, dezenvolve no asegura hosi timor-oan rasik.

Prezidente Konsellu Administrasaun RTTL, E.P, José António Belo ‘Taraleu’. Imajen TATOLI/Francisco Sony

Iha fatin hanesan, Prezidente Konsellu Administrasaun RTTL,E.P José António Belo ‘Taraleu’, apresia no agradese ba institutu públiku ne’e tanba bele ajuda ona infraestrutura no fasilidade ba mídia estatál ne’e atu ajuda fó sai informasaun ne’ebé lalais no kualidade ba públiku.

“Nota entendimentu ne’e loke dalan bele kolabora iha servisu informátika,” nia hateten.

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here