Diretór ezekutivu SAMES, Santana Martins, troka nota entedimentu ho Diretór Ezekutivu TIC Timor I.P, Roberto Caetano de Sousa Vicente, iha salaun SAMES, kuarta (11/08). Imajen Tatoli/Francisco Sony.

DILI, 11 agostu 2021 (TATOLI)—Ajénsia Teknolojia Informasaun no Komunikasasun (TIC Timor I.P sígla portugés), sei asegura serbisu eletrónika iha instituisaun Serbisu Autónoma Medikamentu no Ekipamentu Saúde (SAMES).

Kompromisu ne’e hatuur iha nota entendimentu ne’ebé asinadu hosi jestór hosi  instituisaun rua, iha edifísiu SAMES, Kampung Alor, kuarta ne’e.

Notísia relevante:TIC Timor no MTKI selebra akordu realiza programa tolu

“Ita sei asegura komponente lima ne’ebé hatuur iha nota entedimentu ne’e,” Diretór ezekutivu TIC Timor I.P, Roberto Caetano de Sousa Vicente, hateten ba jornalista-sira  hafoin serimónia asinatura nota entendimentu.

Komponente lima iha SAMES ne’ebé TIC Timor I.P sei asegura mak hanesan, dahuluk sei haree website SAMES.com tl, daruak haree sistema website médiku-nian hanaran MS.SAMES.TL, datoluk haree kona-bá sistema email ofisiál ba SAMES, da-haat publika aplikasaun Sistema SAMES,  dalimak kontinua dezenvolve aplikasaun ne’ebé SAMES presiza iha futuru.

TIC Timor I.P harii iha VI Governu Konstituisionál iha 2017, ho hanoin ida atu hamosu inisiativa Governu ida ne’ebé eletróniku liu.

Ho ida-ne’e  maka desde 2018 to’o agora TIC Timor I.P iha kooperasaun ho instituisaun  Estadu tomak, hamutuk  49 ne’ebé uza ona  serbisu oioin hosi TIC Timor I.P hanesan internete, dezenvolvimentu aplikasaun, parte treinamentu  no seluk tan.

Iha fatin hanesan, Diretór ezekutivu SAMES, Santana Martins, hateten objetivu hosi asina nota entendiemntu ne’e  atu asegura  duni implementasaun programa Governu  eletróniku-nian.

Tanba ne’e TIC Timor I.P ho ninia papél maka oinsá  lori instituisaun hotu-hotu ba iha governasaun eletrónika ida.

“Tanba ne’e mak ohin ita hahú estabelese memorandu entedimentu ba tinan lima, ita bele kontinua ho serbisu tékniku-sira, nune’e TIC Timor I.P  bele akompaña hanesan instituisaun autónomu ida ba medikamentu  no ekipamentu durante ne’e ita uza sistema dijitál eletróniku,” nia hateten.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here