DILI, 21 outubru 2021 (TATOLI)– Ekipa Santa Cruz ne’ebé lidera hosi treinador João Campos obrigadu tenke “derrota” kontra adversáriu São Francisco Xavier, iha jornada 17 jogu Pra Liga Futsal Timor – Leste ne’ebé hala’o, kinta kalan, iha kampu futsal FALINTIL-Forsa Defeza Timor-Leste (F-FDTL) Fatuhada.

Vitória ne’ebé São Francisco hetan liuhosi golu haat ne’ebé prodús durante jogu la’o iha minutu 40 nia laran, nune’e São Francisco iha direitu absoluta ba pontu tolu iha tabela klasifikasaun.

Tama ba jogu primeira parte, ekipa rua lansa kedan kontra no atake ba malu liuhosi pasa bola ain ba ain atu buka hatama golu, maibé sorte monu liu ba São Francisco. Iha minutu ualu jogadór Remígio de Araújo hatama golu hodi lori rezultadu ba 1-0.

Golu ne’e, halo Santa Cruz hahú hatudu jogu ho emossaun, maibe fó duni rezultadu tanba iha minutu 14 jogadór Carcilio Ximenes responde ona golu ida hodi halo empate 1-1.

Ho rezultadu empate provizóriu ne’e, ekipa São Francisco hatudu jogu ho esforsu makas, nune’e iha minutu 19 fó sorte ba jogadór Elderino Rey hatama tan golu ida hodi muda eskore ba 2-1, no to’o minutu primeira parte ramata laiha tan golu.

Semo ba segunda parte ekipa rua nafatin halo kontra no atake ba malu, maibé São Francisco iha forsa liu, nune’e iha minutu 22, Gaudencio Fernandes lansa tan golu ida muda rezultadu ba 3-1.

Ho rezultadu ne’e, jogadór Santa Cruz sira hahú jogu ho tensaun altu no laiha konsentrasaun ne’ebé forte di’ak ba São Francisco lansa tan golu ikus iha minutu 22 liuhosi jogadór Elderino Rey hodi muda rezultadu ba 4-1 to’o jogu segunda parte termina.

Ho vitória ne’ebé iha lori São Francisco pontu sa’e ba 33 iha tabele klasifikasaun zona modok. Enkuantu Santa Cruz nafatin ho pontu 25 iha zona modok ikus liu.

Notísia relevante: Jerman “hisik” Bermeta 6-0

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here