Rezultadu final primeiru jogu iha jornada 17, jogu entre FC Bermeta no Jerman ho eskore 0-6. Imajen/ AFTL.

DILI, 20 outubru 2021 (TATOLI)—Ekipa Jerman FC susesu manán Bermeta FC ho eskore 6-0, iha jogu jornada dala-17, Pra Liga Futsál Timor-Leste ne’ebé hala’o iha kampu futsal FALINTIL-Forsa Defeza Timor – Leste (F-FDTL) Fatuhada, kuarta ne’e.

Ekipa rua tama iha kampu ba jogu primeira parte, lansa kontra no atake ho mehi ida atu hetan vitória. Nune’e, Iha minutu-rua jogadór Domingos de Carvalho lansa ona golu primeiru hodi muda rezultadu ba 1-0.

Ho golu ne’e, jogu sai manas liután, jogadór Bermeta tenta atu halo golu, maibé la hetan oportunidade tanba Jerman la fó fatin no hamate tutuir jogu Bermeta nian.

Nune’e, minutu halai ba 15, Jogadór Henrique da Costa halo tan golu ida lori rezultadu ba 2-0, liu de’it minutu ida jogadór Bernabe Soares fura rede Bermeta hodi muda tan rezultadu ba 3-0.

Minutu primeira parte besik termina forsa jogu hosi Jerman sa’e makas liután, nune’e iha minutu 19, Rafael de Carvalho halo tan golu ida dudu kedan rezultadu ba 4-0.

Dolar ba segunda parte ekipa rua nafatin lansa kontra no atake ba malu iha kampu kuadradu ne’e nia laran, maibé Jerman nafatin domina bola halo Bermeta book an la diak.

Tanba ne’e, iha minutu 24 Jacinto da Costa halo tan golu ida lori esokre ba 5-0, la’ós ne’e de’it iha minutu 27, Rigoberto da Cunha prodús golu ikus hodi uma rezultadu ba 6-0, hodi termina vitória ba Jerman.

Hosi vitoria ne’e, Jerman maka iha direitu absoluta hodi hetan pontu tolu ho pozisaun provizóriu iha tabela klasifikasaun ho pontu 26 iha jona modok. Enkuantu Bermeta kontinua hela ho pontu 18 iha tabela klasifikasaun liña mean.

Notísia relevante : M-VDL Lahane “dere” Boa Sorte 3-2

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here