Sekretáriu Estadu Komunikasaun Sosiál, Merício Juvinal dos Reis Akara hamutuk Prezidente Parlamentu Nasionál, Deputadu Aniceto Longuinhos Guterres Lopes, halo kampaña vasinasaun iha suku Souro, postu administrativu Lospalos, munisípiu Lautém, Sesta (22/10). Imajen Agência TATOLI/Natalino Belo.

LAUTÉM, 22 outubru 2021 (TATOLI) – PrezidentE Parlamentu Nasionál (PPN), Deputadu Aniceto Longuinhos Guterres Lopes no Sekretáriu Estadu Komunikasaun Sosial (SeKoms), Merício Juvinal dos Reis Akara, motiva komunidade suku Soru no suku Fuiloro, postu administrativu Lospalos, Munisípiu Lautém, simu vasina.

Prezidente Parlamentu Nasionál Nasionál, Deputadu Aniceto Longuinhos Guterres Lopes, hateten prezensa iha suku refere nu’udar komitmentu hosi uma fukun atu kolabora apoia programa estadu tomak iha kampaña vasinasaun.

“Iha kampaña hanesan ne’e membru governu, tékniku sira hosi liña frente halo esforsu tomak atu hasai dúvida sira-ne’e iha populasaun nia leet, liuliu atu enkoraja, motiva no esplika ba sira katak vasina importante liu tanba liga ba saúde,” Aniceto esplika ba komunidade sira iha postu administrativu Lospalos, sesta ne’e.

Purtantu, Sekretáriu Estadu Komunikasaun Sosiál, Mericio ‘Akara’, konsidera informasaun kona-ba vasina ne’ebé lansa iha rede sosiál maiória organizadu, balun espontánia ho motivu oinoin hanesan polítika, ekonomia no hakarak dezakredita estadu inklui governu nia polítika.

Tanba ne’e, prezensa hamutuk ho Prezidente Parlamentu Nasionál atu haloos informasaun ne’ebé durante espalla ona iha públiku.

“Informasaun ita tenke halo loos tanba sidadaun iha direitu tomak atu simu informasaun loloos, kredivel. Labele iha ema-ida ka rua ne’ebé tenta atu viola direitu ida-ne’e,” SeKoms hateten iha Souro.

Munisípiu Lautém, totál komunidade ne’ebé partisipa ona kampaña vasinasaun hamutuk 21.507 (59.6%) no ne’ebé seidauk vasina hamutuk 14.911 hosi totál alvu 36.418.

Postu administrativu Lospalos totál komunidade ne’ebé partisipa ona kampaña vasinasaun hamutuk 9.427 (54%) hosi totál alvu hamutuk 17.563.

Notísia relevante: PPN-SeKoms lansa kampaña vasinasaun iha Lospalos

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here