Xefi suku Souro, postu administrativu Lospalos, munisípiu Lautém, Estevão da Costa Pereira, tara tais ba Sekreturia Estadu Komisaun Sosiál, Merício Juvinal dos Reis 'Akara' bainhira kampaña hamutuk ho Prezidente Parlamentu Nasionál halo kampaña vasinasaun iha suku Souro, sesta (22/10). Imajen Agência TATOLI/Natalino Belo.

LAUTÉM, 22 outubru 2021 (TATOLI)— Prezidente Parlamentu Nasionál, Deputadu Aniceto Longuinhos Guterres Lopes no Sekretáriu Estadu Komunikasaun Sosiál (SeKoms), Merício Juvinal dos Reis ‘Akara’, lansa kampaña vasinasaun iha postu Administrativu Lospalos, munisípiu Lautem.

Merício Juvinal dos Reis ‘Akara’ ho Prezidenti Parlamentu Nasionál iha suku Souro atu reforsa serbisu Ministériu Saúde (MS) nian ne’ebé durante halo serbisu maka’as ona ba kampaña vasinasaun.

“Kilat ikusliu mak vasinasaun, hasa’e ita-nia imunidade atu virus kiik-oan ne’e bainhira ita moris ho nia ita-nia imunidade forte ona,” SeKoms Merício hateten iha suku Souro, postu administrativu Lospalos, munisípiu Lautém, sesta ne’e.

Objetivu prinsipál mak atu proteje sidadaun hotu nune’e labele mate tán ho COVID-19, ne’e nu’udar devér estadu nian, bainhira ekonomia kuandu monu bele rekupera, maibé kuandu mate labele moris fali.

Nasaun seluk inklui Organizasaun Nasaun Unida (ONU) mesmu iha fasilidade saúde kompletu maibé nafatin preokupa tanba defísil tebes luta hasoru Covid-19.

Governante ne’e esplika, nasaun hakarak povu moris uluk mak foin dezenvolve ekonomia, tanba ne’e mak presiza vasina hodi normaliza fali situasaun rai-laran, liuliu ekonomia.

“Ita hakarak fulan-novembru no dezembru antes Natál bele atinje ona taxa vasinasaun to’o 70% nune’e bele normaliza fali,” Akara akresenta.

Tuir dadus hosi Ministériu Saúde (MS) totál komunidade Timor-Leste ne’ebé partisipa ona kampaña vasinasaun doze dahuluk 529.855 (70.1%), doze daruak 343.305 (45.5%), totál 872.790 (72.2%)

Enkuantu Munisípiu Lautém, totál komunidade ne’ebé partisipa ona kampaña vasinasaun hamutuk 21.507 (59.6%) no populasaun ne’ebé seidauk simu vasina hamutuk 14.911 hosi totál alvu 36.418.

Entretantu, Sekretáriu Estadu Komisaun Sosial (SeKoms), Merício Juvinal dos Reis Akara hamutuk ho Prezidenti Parlamentu Nasionál (PPN), Aniceto Guterres, autoridade administrativu lokál hala’o kampaña vasinasaun iha suku Souro no suku Fuiluro, postu administrativu Lospalos, munisípiu Lautém.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here