Traballadór EDTL halo instalasaun eletrisidade iha área Comoro, kinta (04/03). Imajen TATOLI/António Gonçalves

DILI, 21 outubru 2021 (TATOLI)–Governu Timor-Leste sei selebra akordu finanseiru ho Banku Dezenvolvimentu Aziátiku (ADB, sigla inglés) ba empréstimu orsamentu hamutuk millaun $35, ba implementasaun sistema dijitalizasaun liña distribuisaun eletrisidade hodi mellora di’ak liután fornesementu enerjia.

Ba kestaun ne’e, Prezidente Konsellu Administrasaun Eletricidade de Timor-Leste, Empreza Públika (EDTL,E.P), Paulo Silva, hasoru malu ho Primeiru-Ministru (PM), Taur Matan Ruak, hodi relata preparasaun balun molok realizasaun seremónia asinatura.

“Preparativu daudaun ne’e hotu ona no hein atu realiza selebra asinatura akordu ho ADB, ne’ebé sei hala’o iha fulan-novembru tinan ne’e,” Prezidente Konsellu Administrasaun EDTL,E.P hateten hafoin hasoru Xefe Governu, iha Palásiu Governu, kinta ne’e.

Notísia relevante : EDTL prioritiza dijitaliza sistema liña distribuisaun eletrisidade

Bainhira projetu ne’e implementa, ekipa téknika sira sei fasil deteta avaria hodi halo intervensaun.

Aleinde ne’e, iha mós hanoin atu kobre instalasaun kontadór automátika atu deskobre ligasaun ilegál.

“Empréstimu ne’e sei finansia halo reabilitasaun ba sede EDTL iha munisípiu tomak,” nia akresenta.

Inisiativa atu moderniza sistema distribuisaun eletrisidade atu hatan bainhira avaria iha fatin ruma, tékniku EDTL bele identifika lokál seluk hodi fornese fali enerjia eletrisidade hosi fatin seluk, nune’e labele fó impaktu ba kliente sira ne’ebé asesu iha liña ka feeder ida de’it.

Aleinde ne’e, sub-estasaun iha kapitál Dili iha ida de’it iha Kamea no ninia liña distribuisaun fornese enerjia eletrisidade hosi Becora to’o Mota-ulun Comoro, tanba ne’e bainhira komunidade ne’ebé hela iha liña ne’e iha problema avaria ida, maka sei la hetan hotu enerjia eletrisidade, nune’e mós ba liña seluk.

Nune’e, bainhira sistema dijitalizadu ona, bele izola de’it iha fatin avariasaun no fatin seluk bele kontinua hetan enerjia eletrisidade.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here