Traballadór EDTL halo instalasaun eletrisidade iha área Comoro, kinta (04/03). Imajen TATOLI/António Gonçalves

DILI, 29 juñu 2021 (TATOLI)Prezidente Konsellu Administrasaun Eletricidade de Timor-Leste, Empreza Públiku (EDTL,E.P), Paulo da Silva, hateten, hahú tau prioridade moderniza sistema liña distribuisaun eletrisidade atu mellora di’ak liután fornesimentu enerjia ba komunidade no fásil kontrola avaria.

“Ita prepera ona dokumentu sira atu dijitaliza sistema liña distribuisaun, ne’ebé sei finansia hosi programa empréstimu, ne’ebé agora daudaun diskusaun namanas hela ho Banku Dezenvolvimentu Aziátiku (ADB, sigla inglés)  ne’ebé iha tempu besik lansa ona,” Prezidente empreza estatál ne’e informa ba Agência TATOLI, iha resintu Ministériu Finansa (MF), Aitarak-laran, tersa ne’e.

Notísia relevante: MOP submete pedidu asesu fundu empréstimu atu moderniza liña eletrisidade

Iha augostu tinan ne’e, Governu liuhosi MF no EDTL, atu halo negosiasaun empréstimu hosi ADB ho montante millaun $35, ho kontra partida ho millaun $15, ne’ebé hamutuk millaun $50.

Tuir nia, bainhira dijitaliza ona sistema distribuisaun eletrisidade, karik iha avaria iha fatin ruma bele indentifika lokál no área no seluk bele fornese fali enerjia eletrisidade hosi fatin seluk, nune’e labele fó impkatu ba kliente EDTL sira ne’ebé asesu iha liña feeder ida de’it.

“Ita uza sistema manuál hela ne’ebé kuandu avaria iha fatin ruma, ita-nia tékniku sira la’o hosi Kamea bá Tasi Tolu hodi haree, tanba ne’e kuandu dijitaliza signifika sistema hotu sentraliza iha sentru elétriku no fásil deteta fatin avaria atu tékniku sira tun rezolve,” nia garante.

Aleinde ne’e, bele ajuda poupa tempu no rekursu tanba kuandu ahi-mate kleur no ema la uza enerjia, EDTL, E.P mós lakon reseita.

“Ita presiza aselera sistema dijitalizasaun ne’e atu sistema distribuisaun sentraliza iha sentru elétrika atu kontrola no fásil halo servisu,” nia subliña.

Dadaun ne’e, EDTL, E.P hahú prepara dokumentu no divulga programa ne’e ba MF atu tenta asesu fundu Orsamentu Jerál Estadu no empréstimu.

Jornalista : Florêncio Miranda Ximenes

Editora      : Julia Chatarina

HAKEREK NO HATÁN

Please enter your comment!
Please enter your name here