Rezultadu jogu iha jornada 17 entre Baucau All Star no Academica FC. imajen/AFTL

DILI, 20 outubru 2021 (TATOLI)– Ekipa Baucau All Star “kulu gisa” susesu duni iha jornada 17 bainhira hasoru nia adversáriu Academica FC iha jogu Pra Liga Futsal Timor-Leste ne’ebé halo iha kampu futsal FALINTIL-Forsa Defeza Timor – Leste (F-FDTL) Fatuhada Dili ho rezultadu 8-4.

Jogu entre ekipa rua ne’e,  Baucau domina liu bola iha kampu laran halo Academica jogu ho emosionál too ikus labele gaña pontu tolu hodi muda pontu ne’ebé tuur hela iha tabele klasifikasaun provizóriu.

Jogu hahú ekipa rua lansa kontra no atake ba malu tuir tékniku no abilidade ida-idak nian, iha minutu 4 jogadór Diviano Soares halo ona golu ida muda rezultadu ba 1-0.

Golu ne’e halo Academica book an la di’ak, nune’e jogu la’o to’o minutu 12, jogadór Ricky Mendonça halo tan golu hodi muda eskore ba 2-0. Academica la nonok de’it esforsu to’o minutu 13 jogadór Filipe Martins halo duni golu ida muda rezultadu ba 2-1.

Jogu la’o to’o minutu 19 jogadór Academica Jenivio de Araujo halo tan golu ida hodi fó empate ba ekipa rua tenke hela ho 2-2.

Academica hanoin tenke hela de’it ona hanesan ne’e, maibé Baucau hafuhu tutuir Academica nia frakeza iha kampu laran nune’e iha minutu ikus primeira parte nian, iha minutu 20 jogadór Carlos Sarmento lansa tan golu ida hodi hatur rezultadu ba 3-2.

Dolar ba segunda parte jogu komesa manas liután entre ekipa rua nune’e iha minutu 22 jogadór Ricky Mendonça halo tan golu ida lori rezultadu ba 4-2.

Maibé, iha minutu 24 jogadór Carlos Sarmenti hosi Baucau lansa tan golu ida muda tiha rezultadu ba 5-2, maibé Academica foin sentra de’it bola iha kampo klaran jogadór Filipe Martins responde kedan golu ida iha minutu ne’ebé hanesan iha minutu 24 muda rezultadu ba 5-3.

Nune’e, iha minutu 35 jogadór Academica Jenivio marka tan golu ida lori rezultadu ba 5-4 maibé golu ne’e la halo Baucau “nakdoko”.

Luta ne’ebé Baucau halo la hela de’it hanesan luta ikus fó duni rezultadu, nune’e iha minutu 37 jogadór Carlos Sarmento lansa tan golu muda rezultadu ba 6-4, la’ós ne’e de’it iha minutu 38 no 39 jogadór Divanio Soares halo golu rua tutuir malu hametin Baucau nia eskore ba 8-4, to’o minutu termina laiha tan golu ruma mak akontese vitória save metin ba Baucau.

Maski, Baucau manán Academica,  maibé ekipa rua nafatin hela iha jona mean hodi hein tan jogu tuir mai bele ultrapasa ba jona modok bainhira  hetan vitoria. 

Notísia relevante: Jerman “hisik” Bermeta 6-0

Jornalista: Hortencio Sanchez

Editór: Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here