DILI, 20 outubru 2021 (TATOLI)— Diretora Saúde Munisípiu Dili, Agostinha Segurado, informa, hahú janeiru to’o setembru tinan ne’e, Servisu Saúde Munisípiu Dili rejista pasiente ho kazu dengue hamutuk 419 , hosi númeru ne’e ema na’in-ida maka mate.
SMD deteta kazu dengue ne’e maihosi Sentru Saúde ne’ebé ejiste iha postu administrativu sira iha munisípiu Dili.
”Ita rejista pasiente dengue 419, ne’ebé hosi totál na’in ida mate iha fulan juñu nia laran,’’ Diretora SMD ne’e, informa ba jornalista sira iha Lesidere, kuarta ne’e.
SMD indetifika munisípiu Dili sai baze ba moras hotu liuliu dengue, nune’e hahú halo preparasaun atu prevene moras ne’e.
Daudaun, SMD mós halo sensibilizasaun ba komunidade sira atu hamoos lixu ne’ebé namkari iha nia uma oin no fatin públiku atu hala’o prevensaun ba dengue.
“Iha fulan ne’e, Ita halo preparasaun tanba udan monu rai ne’e, moras dengue sei aumenta makas, nune’e prepara mós ai-moruk kímiku balun lori ba rega iha bairru fatin risku sira atu hamate susuk dengue sira,” nia akresenta.
Notísia relevante: 2020, SMD rejista pasiente dengue 813, mate na’in 7
Jornalista : Felicidade Ximenes
Editór : Florencio Miranda Ximenes
