Prezidente INSS, Longuinhos Armando Leite. Imajen TATOLI/Egas Cristóvão

DILI, 23 marsu 2021 (TATOLI)—Maski Governu liuhosi reuniaun Konsellu Ministru (KM) aprova ona estabelesimentu fundu rezerva ba seguransa sosiál (FRSS) no ba definisaun modelu jestaun, maibé to’o agora Institutu Nasionál Seguransa Sosiál (INSS) seidauk implementa tanba iha períodu serka sanitária.

Iha loron 16 setembru 2020, Ministériu Solidaridade Sosiál no Inkluzaun (MSSI) no INSS aprezenta iha KM hanesan projetu dekretu-lei ida.

Notísia relevante: Governu aprova kriasaun fundu rezerva ba seguransa sosiál

Tuir Prezidente Konsellu Administrasaun INSS, Loguinhos Armando Leite, intensaun fundu rezerva ne’e hodi rai kontribuisaun hosi benefisáriu seguransa sosiál hosi setór públiku no privadu.

“Kuandu implementa ona, fundu ne’e la’ós rai de’it maibé iha juru hodi aumenta fundu ne’e. Sei iha institutu autónomu ida mak jere fundu, maibé agora tanba foin estabelese maka ninia órgaun másimu mak Prezidente Konsellu Administrasaun INSS, ne’ebé hanesan mós Prezidente fundu rezerva,” Prezidente Konsellu Administrasaun INSS, informa ba Agência TATOLI, via telefónika, segunda (22/03).

Aban bainrua bainhira instituisaun ketak hahú funsiona, sei jere fundu maibé agora estrutura foin Prezidente de’it, enkuantu hanesan diresaun estabelese ketak ona atu halo preparasaun ba transformasaun institutu.

Daudaun ne’e, instituisaun Estadu hotu rejista ona (47%) iha INSS no instituisaun privadu (empreza) sira kuaze 5.000 (53%) mak rejista, ho totál kontribuente hamutuk 100.000.

“Durante ne’e, empreza sira kontribui di’ak tanba lei hateten tenke kontribui 4% hosi saláriu traballadór no 6% hosi empregadór, maski iha kompañia balun hapara traballadór tanba situasaun, maibé sira sempre informa ba INSS bainhira hapara, nune’e hapara 6% hosi empreza rasik,” nia akresenta.

Maibé, ba sira ne’ebé sei ativu hela kontinua la’o no empreza balun hato’o mós pedidu sira labele selu 6% relasiona ho pandemia COVID-19.

“Tanba ne’e, Governu ajuda emprezáriu sira atu despensa kontribuisaun empregadór 6% no daudaun sei ajuda hela sira liuhosi programa rekuperasaun ekonómika,” Prezidente Konsellu Administrasaun INSS hatutan.

Kuandu empregadór la kumpre ninia dever selu 6%, sei iha implikasaun ba traballdór tanba bainhira tama ona idade reforma sei simu direitu no labele hanesan ho ema ne’ebé selu normál, tanba lei hateten tenke selu no la selu tenke fó razaun.

“Dalaruma 6% tanba selu hosi empregadór, kuandu sira la selu agora daudaun seidauk iha inspesaun traballu, maibé INSS kolabora hamutuk ho Sekretaria Estadu Formasaun Profisinál no Empregu (SEFOPE) atu haree tuir empreza ne’ebé lakohi selu kontribuisaun  ba traballadór, sei buka tuir tanba lei hateten kompañia hotu tenke fó garantia traballadór sira liuhosi seguransa sosiál,” nia esklarese.

Maski nune’e, durante ne’e INSS seidauk identifika kompañia ne’ebé la kumpre ninia dever selu 6% no traballadór 4%.

“Empreza sira iha hanoin di’ak no balun komprende di’ak ona, tanba ne’e maka institutu loron ba loron simu kompañia barak mak ba rejista nafatin,” nia tenik.

Empreza setór non formál 1.700 rejistadu iha ámbitu COVID-19

Aleinde loke inskrisaun ba setór privadu, loke mós ba setór non formál ka fakultativu, ne’ebé daudaun rejista ona iha ámbitu COVID-19 ne’e kuaze 1.700 atubele fasilita iha programa rekuperasaun ekonómika Governu no ba seguransa iha futuru.

“Hatudu katak ema komesa hanoin di’ak ona ba seguransa sosiál, katak INSS ne’e institutu ne’ebé hambrik atu garante traballadór iha aban bainrua kuandu tama ona iha situasaun ne’ebé la produtivu ona,” Prezidente Konsellu Administrasaun INSS tenik.

Iha implementasaun programa rekuperasaun ekonómika ligadu ho surtu COVID-19, INSS iha medida tolu, hanesan ativa empreza nia atividade, fó apoiu non formál ou individu no medida ikus mak despensa 6%.

Kona-ba benefisia atividade ne’e, INSS fó ba empreza ne’ebé durante ne’e rejista ona hamutuk 1.600-resin iha seguransa sosiál hanesan setór non formál foun, ne’ebé durante fulan haat implementa rekuperasaun ekonómika.

“Maibé programa rekuperasaun ekonómika ne’e tuir dekretu-lei númeru 51 taka ona iha 28 fevereiru 2021, ne’ebé daudaun INSS hato’o ona proposta foun ba Governu maibé seidauk iha desizaun,” nia katak.

Iha sorin seluk, fulan ikus 2020, INSS rekolla ona kontribuisaun seguransa sosiál hamutuk millaun $93 no previzaun katak iha tinan ne’e ramata bele atinje to’o millaun $100 kuandu situasaun hotu la’o di’ak.

“Daudaun ami foin fó direitu oin rua, kompostu hosi pensaun tolu hanesan sobrevivénsia, velisia no morte, seluk mak hanesan diretu paternidade, maternidade, risku klíniku no adopsaun, ne’e ami fó ona hanaran parentalidade, ne’ebé benefisiáriu sira hetan barak liu mak paternidade, maternidade, no pensaun,” nia esplika.

Kona-ba pensaun, tanba ema barak tama ona idade reforma, benefisáriu hato’o ona pedidu atu hetan direitu paternidade no maternidade.

“Pedidu ne’e kuaze tama loron-loron, pensaun nia kuaze benefisáriu 400 mak hatama ona pedidu,”  responsável ne’e subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here