Labarik sira hela iha sentru evakuasaun Don Bosco Comoro. Imajen/Facebook: FMA Tatoli Ksolok Evangellu.

DILI, 19 outubru 2021 (TATOLI)—Komisária Nasionál Direitu Labarik (KNDL), Dinorah Granadeiro, hateten KDNL rejista labarik hamutuk 100-resin mak hela iha sentru akollamentu Manleuana.

Notísia Relevante:MSSI rejistu ona labarik afetadu dezastre naturál hamutuk 1.209

“Ami hatene iha sentru akollamentu Manleuana kuaze labarik hamutuk 100-resin mak hela iha ne’ebá,” Dinorah Granadeiro hateten ba Ajénsia Tatoli, hafoin hala’o sensibilizasaun kona-ba konvensaun labarik iha Eskola Ensinu Sekundáriu Jerál (ESJ) 05 de Maio, Becora, Dili, tersa ne’e.

Nia espera, Governu liuhosi Sekretária Estadu Protesaun Sívil (SEPS) bele rezolve ona situasaun ba labarik sira, tanba daudaun ne’e atu tama ona ba tempu udan.  

“Ami mós espera katak Governu, liu-liu Sekretária Estadu Protesaun Sívil iha tempu badak bele rezolve situasaun ida-ne’e. Tanba, ita hatene katak udan mós besik mai ona no risku atu sira kontinua sai hanesan vitíma ne’e boot tebes,” nia dehan.

Nia hateten, bainhira KNDL hetan informasaun kona-ba labarik sira iha sentru akollamentu, KNDL kanaliza situasaun labarik sira-nian ba iha ministériu relevante sira-ne’ebé mak iha responsabilidade atu proteje labarik sira.

Komisária Komisaun Nasionál Direitu Labarik (KNDL), Dinorah Granadeiro, hateten ekipa hosi MSSI liuhosi KNDL ho UNICEF no SEII sei kontinua akompañia liuhosi programa monitorizasaun ba labarik sira iha sentru akollamentuu sira-ne’e.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here