Ministru Koordenadór Asuntu Ekonómiku (MKAE), Joaquim Amaral. Imajen TATOLI/Francisco Sony

DUBAI, 16 outobru 2021 (TATOLI)—TradeInvest ka Ajénsia Promosaun Investimentu no esportasaun organiza enkortu amigavel ho parseiru dezenvolvimentu hosi Austrália, Nova Zelandia no Guine Bissau iha ámbitu Expo Dubai 2020 iha Dubai.

Notísia Relevante: Pavillaun Timor-Leste demonstra Governu nia kompromisu promove imajen nasaun

 Nasaun Timor-Leste liuhosi TradeInvest sai nu’udar uma-na’in hodi realiza sorumutu amizade ho parseiru dezenvolvementu sira hodi diskute kona-bá preparasaun ba enkontru extraordinária ba negósiu (business forum) ne’ebé sei realiza iha fulan novembru no dezembru 2021.

“Objetivu prinsipál hosi enkontru amigavel ne’e atu hametin liután koordenasaun hodi fahe esperiénsia iha asuntu komérsiu no investimentu hodi bele hasa’e kresimentu ekonomia rai-laran,” Ministru Koordenadór Asuntu Ekonomia (MEKAE), Joaquim Amaral, hateten ba jornalista sira iha AL Wasl Plaza, Expo Dubai 2020, iha sabadu ne’e.

Iha eventu exibisaun mundiál ne’e, nia dehan, nu’udar oportunidade ida ba parseiru tomak iha mundu tomak hodi fahe ideia, esperiénsia nomós aprezenta progresu alkansa ona iha área negósiu nian, no ho oportunidade ida-ne’ebé enkoraja liután nasaun seluk mós esforsu makaas hodi bele alkansa mós sira-nia mehi iha futuru.

“Rekursu umanu sai nu’udar pontu importante ba negósiu, hodi bele diskute kle’an liután kona-bá negósiu nomós bele buka solusaun hodi rezolve problema, karik akontese,” Governante ne’e hateten.

Nasaun Timor-Leste sei partisipa mós iha enkontru extraordinatira negósiu nian iha fulan novembru no dezembru iha tinan ida-ne’e.

Eventu expozisaun Dubai 2020 lori hamutuk nasaun sira iha mundu tomak ho objetivu atu promove sira-nia produtu nomós hatudu progresu alkansamentu ba sira-nia investimentu, negosiu no inovativu.

Diretór TradeInvest, Arcanjo da Silva, hateten Timor-Leste foti oportunidade ida-ne’e hodi hakat tán pasu ida iha mundu negósiu nian maibé presiza tebes apoiu hosi nasaun seluk, no iha eventu expo Dubai ne’e sei halo mundu sai nabilan liután hodi rezolve problema sira liuhosi foti desizaun hamutuk.

Presidente Autoridade National Petróleu no Minerál, Florentino Mateus Soares Ferreira, hateten Timor-Leste kontinua hetan oportunidade atu promove rekursu hotu, maske rekoñese katak menus rekursu umanu ba explorasaun mina no gas inklui mós setór minerál nian. 

Komisáriu Jerál-Expo Dubai hosi Nova Zelandia, Clayton Kimton, informa nia parte sente haksolok hodi atende sorumutu amizade ida-ne’e no Nasaun Nova Zelandia iha kompromisu atu apoiu Timor-Leste.

“Ha’u hakarak rona informasaun ruma hosi liña ministeriu sira hodi rekolla informasaun kona-bá programa enkontru negósiu extraordináriu ne’ebé sei realiza iha fulan novembru no dezembru. Apresia tebes bele hola parte iha eventu mundiál hodi fahe esperiénsia iha área negósiu nian, atu ideia bele benefisia ba nasaun seluk mós,” nia hateten.

Iha fatin hanesan, Vise Komisáriu Jerál Austrália, Clare Conney mós informa forum negósiu mundiál nu’udar momentu espesiál ida hodi halibur ideia no fahe esperiénsia hosi parseiru sira, nomós rekolla informasaun ba área negosiu no investimentu iha tempu tuir mai.

“Ha’u sei rekolla informasaun relasiona ona ho progresu hosi atinjementu ne’ebé nasaun ida-idak hetan ona inklui mós Timor-Leste. Ha’u sei lori ideia hotu ne’ebe rona hosi membru parseiru sira ba Austrália hodi aliña ho polítika Governu Australia nian ba negósiu no investimentu,” nia hateten. 

Journalista : José Belarmino De Sa

Editór        : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here