Primeiru-Ministru, Taur Matan Ruak, prezide reuniaun Konsellu Ministru. Iha Palásiu Governu, segunda (13/10). Imajen TATOLI/Francisco Sony

DILI, 13 outubru 2021 (TATOLI)—Governu liuhosi reuniaun Konsellu Ministru (KM) ordinária iha kuarta ne’e, rona aprezentasaun hosi Ministra Saúde (MS), Odete Maria Freitas Belo, kona-ba kampaña vasinasaun ne’ebé konta ho partisipasaun membru Governu sira hotu.

Durante períodu ne’e, membru Governu iha munisípiu hotu hodi fahe informasaun kona-ba importánsia vasina kontra COVID-19.

“Desde hahú kampaña ho partisipasaun membru Governu sira, administra ona totál vasina 78.165, ne’ebé hanesan aumentu ida 17% hosi persentajen vasinasaun iha nível nasionál,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu ne’e iha Palásiu Governu.

Durante semana loron 30 setembru to’o loron 10 outubru, Bobonaro nu’udar munisípiu ho kreximentu boot liu, ho aumentu 30)%, hosi totál hamutuk ema na’in-7.487 ne’ebé simu ona vasina iha períodu ne’e, ne’ebé liu tan 5.629 kompara ho semana anteriór.

Tuir fali munisípiu Baucau ho kreximentu 122%, ne’ebé vasina tan ema hamutuk 5.286 kompara ho iha semana anteriór, munisípiu Ermera iha ona 97% kompara ho semana anteriór hosi inísiu kampaña vasinasaun ho membru Governu sira, ne’ebé vasina tan ema hamutuk 3.885 kompara ho períodu anteriór.

Prevee katak vasina dahuluk Pfizer, ne’ebé destina hodi permite vasinasaun ba joven sira ho idade 12 to’o 17, to’o iha Timor-Leste iha loron 16 outubru oinmai hosi mekanizmu COVAX.

Notísia relevante: Sábadu, vasina Pfizer doze 100.620 to’o Timor-Leste

Enkuantu, bazeia ba sistema informasaun saúde ne’ebé atualizadu to’o iha tersa (12/10) tuku 10:00, populasaun elijível tinan 18 ba leten iha teritóriu nasionál ne’ebé simu ona vasina doze dahuluk hamutuk 65% enkuantu daruak 41%, munisípiu Dili doze dahuluk atinje 79,5% daruak 70,5%.

Tuir fali mak munisípiu Viqueque 78,6% iha doze dahuluk no doze daruak 48,9%, Covalima doze dahuluk 77,9%, doze daruak 50,2%, Rejiaun Administrativa Espesiál Oé-cusse Ambeno (RAEOA) doze dahuluk 75,1%, doze daruak 39,6%, Baucau doze dahuluk 65,2%, doze daruak 32,9%.

Munisípiu Manufahi iha doze dahuluk atinje 63,7% doze daruak 28,5%, Manatuto doze dahuluk 62,1% doze daruak 29,4%, Aileu doze dahuluk 56,3% doze daruak 22,4%, Lautém doze dahuluk 54,9% doze daruak 28,7%, Liquiçá doze dahuluk 53,9%, doze daruak 26,5%, Bobonaro doze dahuluk 48,1%, doze daruak 25,4%, Ermera doze dahuluk 43,7%, doze daruak 13,5% no ikus liu mak Ainaro doze dahuluk atinje 42,4%, doze daruak 17,5%.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here