Responsavel Kaixa Unidade Alfa 7 iha Ossuala, Luis Jose Perreira. Imajen Tatoli/Nelson de Sousa.

BAUCAU, 15 outubru 2021 (TATOLI)—Responsável kaixa Unidade Alfa 7, Luis José Perreira, hosi suku Ossouala, postu administrativu Vemasse, munisípiu Baucau, fó sasin kona-ba kaixa klandestina ne’e nia involvimentu iha luta rezisténsia ba Arkivu no Muzeu Rezisténsia Timorense (AMRT) Institutu Públiku.

Notísia Relevante: Kaixa Sadere entrega dokumentu rezisténsia ba AMRT

“Organizasaun Alfa 7 hetan entrevista hosi AMRT hodi hato’o  kona-ba  nia involvimentu iha luta rezisténsia ligadu ba kaixa ne’e,  hahú la’o oinsá no ligasaun ho ai-laran,” Luis José Perreira hateten ba Agência Tatoli iha Ossouala, sesta ne’e.

Istória luta importante konserva iha muzeu hanesan obra Estadu nian hodi jerasaun fon sira bele konta nafatin labele lakon, nune’e prontu kolabora ho AMRT iha prosesu entrevista hodi fornese informasaun hotu atu bele hakerek ba istória ho loloos.

Responsavel kaixa ne’e hateten, nia parte halo de’it entervista ho AMRT ligadu Alfa 7 nia operasaun no akontesimentu sira iha Ossouala, maibé seidauk bele entrega dokumentu tanba sei rona estrutura organizasaun ne’ebé kaixa ne’e tutela ba iha nivel nasionál.

“Tanba kaixa ne’e hanesan parte hosi organizasaun Nukleu Dirijente Halibur 001 nivel nasionál iha estrutura, nune’e presiza rona orientasaun bainhira hamutuk deside ona entrega mak sei entrega. No dokumentu barak hosi kaixa klandestina hotu-hotu ne’ebé mak iha organizasaun nivel nasionál Nukleu Dirijente Halibur 001 nia ramu iha kaixa 14 no sub-grupu 163,” nia dehan.

Bainhira AMRT mai iha Ossouala hodi rekolla ba dokumentu rezisténsia, nia parte konsulta kedas ho nasionál no iha tempu oin mai mak sei halo koordenasaun fila-fali ho Konsellu Veteranu no muzeu rasik mak sei entrega dokumentu rejisténsia iha nasionál.

“Ami iha dokumentu barak rezisténsia nian hanesan karta korespondensia hosi ai-laran no iha vila ho sira seluk ne’ebé iha tempu funu subar kee-rai tau iha balde no plástiku laran mak hakoi to’o agora kondisaun sei di’ak,” Responsável Unidade kaixa Alfa 7, Luis José Perreira, hateten.

Kaixa unidade Alfa 7 harii iha tinan 1981 ho inisiativa mai hosi Falintil rasik tutela komandu rejiaun II liuhosi asisténsia rede mai iha fatin Reabutuana Ossouala no sentidu tau naran Alfa 7 hanesan númeru kódigu revolusionáriu militár sira-nian.

Kontribuisaun kaixa ne’e mak hala’o operasaun iha Ossouala fornese hahan, ai-moruk, kilat musan, granada, farda, rádiu Hand Talking (HT), osan ruma presiza no seluk tan hodi reforsa Falintil iha ai-laran.

“Alfa nia papél mak halo koordenasaun no simu informasaun hosi ai-laran no karta ruma hosi lideransa sira-ne’ebé mak iha vila laran hodi dirije ba responsável husu  hahan no ai-moruk ruma no sasán ne’ebé presiza,” nia subliña

Kontribuisaun sira-ne’e iha ligasaun direta ho asisténsia Falintil hanesan rede komandante Sico Belo, Komandante Amico, Komandante Manu Bela, Komandante Maubuti no sira seluk tán

Iha prosesu luta mezmu hasoru persegisaun no ameasa oioin maibé kaixa ne’e iha vila laran kontinua halo ligasaun ativu ho Falintil sira iha ai-laran ho estratéjia hotu atu bele ultrapara.

”Inisiu ami iha prinsípiu kedas mezmu ho intimidasaun no presaun oioin. Maibé, ho fuan ho laran, luta nafatin la hakiduk tanba liuhosi juramentu hemu raan espíritu naturál no ho vontade espiritu nasionalizmu nafatin hodi luta ba ita-nia rain,” nia hateten.

Enkuantu membru keixa Alfa 7 iha totál 500-resin no daudaun ne’e balun sei moris no balun hetan ona rekuñesimentu hosi Estadu ho grau 4-a7.

Jornalista : Nelson de Sousa

Editór        : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here