Komunidade iha Lagoa Tasi-Tolu, kuru bee iha tanke bee estabelesidu, kuarta (05/05/2021). Imajen TATOLI/António Gonçalves

DILI, 15 outubru 2021 (TATOLI)–Autoridade Nasionál Água no Saneamentu, Institutu Públiku (ANAS, I.P), sesta ne’e, realiza WASH forum hodi diskute kona-ba bee, saneamentu no ijiene.

Prezidente ANAS, I.P, Domingos Pinto, hateten, atividade ne’e tanba haree ba mandatu autoridade ne’ebé konsagra ona iha dekretu-lei númeru 38 no 41 /2020, loron 23 setembru, hodi asegura abordajen sustentável no integradu iha jestaun rekursu bee no saneamentu.

“Konjuga ho objetivu iha Planu Estratéjiku Dezenvolvimentu Nasionál (PEDN) 2011-2030, ne’ebé Timor-Leste hakarak atu mellhora asesu bee no saneamentu to’o 2030, ANAS nu’udar institutu reguladór públika ne’ebé iha papél fundamentál atu asegura sustentabilidade jestaun no utilizasaun rekursu bee iha territóriu Timór laran tomak, hahú hosi área urbana no rurál,” Prezidente institutu públiku ne’e hateten, durante forum, iha salaun São Paulo, Comoro.

Atividade hanesan kuaze la la’o besik tinan rua tanba situasaun COVID-19 no mudansa reforma instituisionál.

“Entaun ohin ANAS hakarak reativa filafali apoiu hosi parseiru sira, atu nune’e hahú bolu fali setór sira ne’ebé hala’o atividade iha bee no saneamentu atu serbisu iha área bee no saneamentu hodi iha koordenasaun di’ak,” nia akresenta.

Liuhosi forum diskusaun, problema importante ne’ebé sei foka maka oinsá entidade hotu bele hamutuk halo koordenasaun di’ak atu implementa atividade ba setór bee tanba presiza mellora di’ak liután serbisu.

“Kona-ba bee-moos, daudaun ne’e komunidade Dili barak mak enfrenta falta bee tanba haree hosi ninia rekursu bee rasik, tuir peskiza, hatudu iha nível la sufisiente ba komunidade, tanba iha fatin balun komunidade fura bee, entaun bee menus, bele dehan bee menus ne’e hosi rai-okos no konjunta ho bee rai-leten, ninia rekursu bele iha ona nível tuun,” Prezidente ANAS esplika.

Notísia relevante: BTL, E.P hadi’a hotu ona sistema bomba bee 26 ne’ebé hetan estragu

Tanba númeru populasaun aumenta, iha futuru sei sai problema, nune’e atu responde ba kestaun ne’e, Governu iha ona planu foun atu buka alternativa ho rekursu adisionál hodi rezolve problema hanesan regula númeru perfurasaun bee no prezerva bee.

Enkuantu kona-ba saneamentu, ANAS I.P ne’ebé foin hahú funsiona, daudaun ne’e halo hela  preparasaun kuadramentu legál.

“Hanesan reguladór, tenke iha kuadru legál ne’ebé forte, atu nune’e bele asegura ita-nia funsaun, hanesan lixu sira ne’ebé namkari iha Dili laran neineik ita sei regula tanba prepara ona kuadramentu legál,” nia hateten.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here