Imajen/Mídia BTL, EP.

DILI, 12 abril 2021 (TATOLI)—Prezidente Konsellu Administrasaun Bee Timor-Leste, Emprezária Públiku (BTL, EP), Carlos Peloi dos Reis, hateten dezastre naturál ne’ebé foin lalais akontese estraga kanalizasaun ka sistema bomba bee-moos hamutuk 26 ne’e, agora daudaun parte tékniku hadi’a hotu ona.

Notísia Relevante: PM Taur orienta BTL,E.P prepara planu fornese bee-moos ba populasaun

“Ita-nia bomba sistema bee-moos kuaze 26 ne’ebé iha Dili laran hetan estragu hosi inundasaun ne’e, antes konsege rekopera uluk sanulu, maibé to’o horibainrua (sabadu,10/04) ne’e, ita konsege rekopera hotu ona no hela ida de’it mak seidauk hadi’a. Maibé, orsida parte tékniku relata mai mak ita haree. Ne’ebé, ita konta karik 60% mak bele aseu fali ona bee-moos,” Carlos Peloi dos Reis hateten ba Agência TATOLI, liuhosi telefónika, segunda ne’e.

Nia hatutan, maske sistema bomba bee’moos hadi’a hotu maibé agora sistema abastamentu bee-moos nian ne’ebé akaptasaun hosi mota nian ne’e seidauk bele hadi’a, tanba inundasaun ne’ebé akontese ne’e kuaze estraga totál.

Nia informa, agora daudaun iha área Dili laran ne’e, komunidade barak mak hahú asesu fali ona bee-moos maibé iha área balun mak seidauk bele asesu bee-moos.

“Sistema bomba sira-ne’ebé hadi’a ona ne’e komunidade bele asesu ona ba bee-moos, tanba bomba sira-ne’e ninia distribuisaun bee-moos iha zona sira-ne’e, iha antes tiha ona. Agora komunidade ne’ebé seidauk bele asesu ba bee-moos ne’e mak zona sira ne’ebé durante konsumu bee-moos hosi mota sira-ne’e tanba sistema seidauk hadi’a,” nia dehan.

Nia haktuir, daudaun ne’e komunidade ne’ebé asesu bee-moos hosi bee-mota ne’e mak hanesan hosi Cental, Ai-Tahan Belar, Sede Suku Camea, Manleuana, Bairru Pité, Palapasu, Becora Mota-Ulun, Becora terminal, Ailok-Laran, tanba sistema iha ne’ebá mós rahun.

“Sira ne’e asesu bee-moos hosi akaptasaun sistema Mota Maloa, Benamauk, Mutu Dare Lakoto, Nahaek, Lahane Ocidentál. Tanba akaptasaun hosi Mota ne’e mak todan, tanba mota estraga ninia akaptasaun ho tranzisaun ne’e. Tanba, kanu tanzisaun ne’ebé lori bee mai iha tratadu ne’e mak aat hotu,” nia informa.

Ba komunidade ne’ebé seidauk asesu bee-moos, nia dehan, ekipa ékniku BTL, EP sei halo esforsu tanba daudaun ne’e tékniku sira hahú foti informasaun detallu kona-ba estragu sira-ne’e no inklui haree nia kustu detalladu.

“Todan uitoan tanba sasan sira-ne’e mota estragu hotu. Ne’ebé, sistema sira-ne’ebé aat ne’e tuir estimasaun tekniku sira-nian ne’e, lais liu ne’e loron hitu, semana rua, tolu no fulan rua no lae fulan tolu. Maibé, ami esforsu nafatin no espera katak seidauk to’o fulan rua-tolu ne’e, bele hadi’a hotu ona,” nia hateten.

Tanba, nia dehan, esforsu ne’ebé sira halo haree ba kapasidade responde sedu nian ne’e todan uitoan tanba sira halo tuir buat ne’ebé sira bele no tuir kbiit ne’ebé iha sira iha hodi halo esforsu sira-ne’e.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here