Jogadór Santa Cruz FC kamizola metan esforsu hela hadau-malu bola ho jogador Kablaki FC iha joga divisaun II, Liga Futeból Timor-Leste, kuarta 13 otubru 2021 iha Estádiu Munisipál Dili, Imajen Tatoli/António Gonçalves

DILI, 13 outubru 2021 (TATOLI)–  Ekipa Kablaki FC ne’ebé lidera hosi treinadór João Fernandes obrigadu tenke derotadu kontra nia adversáriu Santa Cruz FC ne’ebé komanda hosi nia treinadór João Campoz ho eskore 3-1 iha jogu kontinuasaun Liga Futeból Timor –Leste (LFTL) ne’ebé halao iha Estádiu Munisipál Dili, kuarta loraik ne’e.

Hanesan baibain iha minutu dahuluk ekipa rua tenke lansa kontra no atake ba malu tuir tátiku, tékniku no abilidade ekipa ida-idak nian hosi duir bola ain ba ain atu buka hatama golu hodi fó vitória ba ekipa.

Santa Cruz hala’o jogu ho meiu ofensivu atu dudu bola long ba malu no asaun remata ne’e barak mak jogadór Santa Cruz João Paulo Sousa (8), Julinho da Costa (17) no Alexandre Corsino (9), la konsege kona iha alvu no barak mós guarda rede Kablaki Pablo de Jesus (20) konsege salva.

Enkuantu, Kablaki halo jogu iha meiu hotu, halo bola long, halo jogu defensivu no ofensivu maibé tátiku hirak ne’e, hela de’it hanesan tátiku tanba labele sobu defeza Santa Cruz nian na’in haat (4) hanesan, Danilo Alves (5), Nelson dos Reis (18), Elroy Braz (15) no Wilian Vong (16).

Hosi falla ne’ebé Kablaki iha fó biban kedan ba Santa Cruz nia jogadór sira hodi halo jogu manas liutan iha kampu laran.

Jogadór Santa CruZ FC selebra golu ho nia kolega sira hafoin hatama golu ba Kablaki FC iha jogu segundu divisaun, Liga Futeból Timor-Leste, kuarta 13 otubru 2021 iha Estádiu Munisipál Dili, Imajen Tatoli/António Gonçalves

Nune’e, iha minutu 38 jogadór Emiliano Soares (11) hetan kedan oportunidade bola pasa ida ho kalma hosi nia amigu Liborio Jerónimo (10) konsege fura kedan rede Kablaki nian hodi muda rezultadu ba 1-0.

Hosi golu ne’ebé iha halo Kablaki nia treinadór João Fernandes la tur nonok de’it iha fatin. Nia halai tun sa’e hodi orienta nia jogadór sira nafatin amizade ba malu iha kampu laran.

Orientasaun hirak ne’e hatudu duni prova ba Kablaki tanba iha minutu 43, mosu kantu iha liña Santa Cruz nian ne’ebé suta hosi jogadór Olegario Nunes (10) no simu kedan hosi jogadór Angelito Oliveira (14) ho nia ulun hodi baku tama liu ba rede laran no la bele salva hosi guarda rede Marcio das Dores (20) muda kedan rezultadu ba 1-1.

Hosi golu ne’e mak hanesan golu ikus iha minutu primeiru ba ekipa rua tanba to´o minutu 45 termina laiha tan golu ruma mak akontese.

Iha menutu intervalu ekipa rua tenke deskansa menutu 15 hodi hemu bee no dada iis hafoin tama fila fali ba kampu laran hodi luta atu hadau pontu tolu ne’ebé hein hela iha iha tabela klasifikasaun provizóriu.

Dolar ba segunda parte, ekipa rua nafatin lansa kontra no atake ba malu, maibé Santa Cruz domina liu bola hodi fó presaun makas ba Kablaki hodi halo jogadór sira tenke servisu makas liutan.

Iha tribun leten parte loromonu enfeita ho adeptu oioin hosi ekipa rua maibé ladun fó lian makas hodi suporta sira nia ekipa favóritu. Nune’e jogu lao iha ambitu hakmatek no jogadór-sira mak tenke hakilar malu hodi orienta malu atu hatudu jogu ne’ebé bonitu.

Hosi jogu furak ne’ebé ekipa Santa Cruz lansa, fó duni rezultadu di’ak ba sira tanba iha menutu 52 jogadór Santa Cruz Alexandrino Corsino (9) hatama tan golu ida hodi hatur rezultadu ba 2-1.

Iha menutu sira ikus-ikus jogu sai manas liutan no hetan bola hodi suta ho velosidade as no makas hosi nia amigu Deonidio Maia jogadór Santa Cruz Alito da Cruz (19) utiliza kedan oportunidade foti bola as iha rede Kablaki nia oin kona liu ba defeza Kablaki Acoli Maia (5) nia liman no árbitru konsege foti desizaun fó penalidade no oportunidade di’ak monu kedan ba Santa Cruz. Jogadór  Liborio Jerónimo ezekuta kedan oportunidade ne’e hodi lansa suta livre halo guarda rede tenke tuda an sala no bola tama kedan ba rede laran rezultadu tur metin kedan ba 3-1.

Golu ne’e mak hanesan golu ikus iha jornada dahuluk ba ekipa rua ne’e ho pontu tolu hela metin kedan ba Santa Cruz nia liman no Kablaki tenke fila ho zero.

Jogu ne’e dirije hosi árbitru Francisco Pereira, juiz liña Filomeno da Silva, Paulo da Costa no árbitru rezerva Duarte Henrique.

Notísia relevante: Abertura Liga Timor-Leste , Porto Taibesi manán Zebra FC 1-0

Jornalista: Hortencio Sanchez

Editór: Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here