Kontra-atake entre jogadór FC Porto Taibesi no Zebra FC iha abertura Liga Futeból Timor-Leste segundu divizaun. Imajen/média LFTL

DILI, 12 outubru  2021 (TATOLI)—Abertura Liga Futebol Timor-Leste (LFTL) segunda divisaun, tersa (12/10), FC Porto Taibesi manán Zebra FC ho rezultadu 1-0.

Durante jogu, ekipa rua hatudu jogu ne’ebé di’ak tebes,  foin la’o minutu rua FC Porto Taibesi ne’ebé  komanda husi kapitaun João Perreira, lansa suta maka’as ba guarda rede, maibé defeza  Zebra, Leonel Gama, konsege salva bola ne’e.

Ho ameasa suta ne’e, halo ritmu jogu entre ekipa rua iha kampu estádiu munisipál Dili hahú manas liutan ho tátika kontra-atake ne’ebe ho ambisaun atu prodús golu.

Iha minutu ikus antes jogu primera parte atu termina, jogadór FC Porto Taibesi ho númeru kamizola 9, Jardel Piedade, konsege hatama golu ba Zebra FC, maibé árbitru anula tanba offside no golu refere inválidu.

Tama ba segudu parte, ekipa FC Porto Taibesi no Zebra hahú fó presaun ba malu liuhosi kontra-atake, maibé liña defeza parte rua la fó oportunidade ba avansadu sira atu hatama golu.

Nune’e, ekipa Zebra FC mós  hahú halo mudansa ba tátika jogu no FC porto mós hahú forma tátika foun iha liña klaran ne’ebé komanda hosi jogadór Eusebio Almeida.

Iha minutu 89, jogadór FC Porto Taibesi, João Perreira, hit bola hosi kantu ne’ebé aproveita di’ak hosi jogadór Januário Pinto hodi muda eskore ba 1-0 no lori vitória ba Porto Taibese.

Hafoin jogu, treinadór ekipa Zebra FC, Rogéiro Mog, dehan ho fuan boot simu derrota no ba oin sei hadi’a jogu.

“Ha’u simu derrota ida ne’e no ba oin sei hadi’a di’ak liután liña defeza, tanba golu iha minutu ikus fallansu koordenasaun defeza -sira”, treinadór Zebra FC hateten ba jornalista sira hafoin jogu ramata.

Iha biban seluk, treinadór Porto Taibesi FC, José Moniz de Jesus Gomes, kontente tanba nia ekipa bele hetan pontu tolu iha jogu abertura liga futeból Timor-Leste, segunda devizaun.

“Ami sei hadi’a buat balun hodi jogu tuir mai bele hatudu performa ne’ebé di’ak liután”, treinadór José afirma.

Jornalista: Natalino Costa

Editór: Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here