Veteranu iha kaixa klandesitina sira iha Ossouala entrega dokuentu reziaténsia ba AMRT. Imajen Tatoli/Nelson de Sousa.

BAUCAU, 14 outubru 2021 (TATOLI)—Veteranu Manuel Locateli Gusmão Soares ‘Lotuk’, konsidera prezensa hosi Arkivu no Muzeu Rezisténsia Timorense (AMRT) Institutu Públiku, iha suku Ossouala, postu administrativu Vemasse, munisípiu Baucau, hodi rekolla dokumentu rezisténsia hosi kaixa klandestina sira, hanesan parte ida atu prezerva istória Timot-Leste iha luta libertasaun nasionál.

Notísia Relevante: Kaixa Sadere entrega dokumentu rezisténsia ba AMRT

“Istória ba ema ida-idak nian dalaruma mate labele konta ona, nune’e liuhosi ne’e, na’in rasik bele konta hela no dokumentu hirak ne’ebé entrega ba AMRT bele prezerva istória iha muzeu, hodi jerasaun sira tuir mai bele hatene,’’ Manuel Locateli Gusmão Soares ‘Lotuk’ hateten ba Agência Tatoli iha Ossouala, Vemasse, Baucau, kinta ne’e.

Nia parte prontu kolabora no husu kaixa sira oinsá bele kontribui iha prosesu rekolla dokumentu ne’e no fó entrevista sira hodi bele AMRT prezerva sai istória loloos no to’o ikus ema labele inventa istória.

Domingas Gusmao Goulart prepara dokumentu rezisténsia atu entrega ba AMRT. Imajen Tatoli/Nelson de Sousa.

Veteranu ho grau 15-19 ne’e, fó sasin katak, kontribuisaun kaixa klandestina iha prosesu luta ba autodeterminasaun importante tebes, tanba fornese apoiu hanesan ai-han, ai-moruk no seluk tán ba Falintil sira iha ai-laran hodi eziste kontinua luta to’o Timor-Leste hetan independénsia.

“Membru kaixa sira mak fasilita informasaun oioin iha vila ba Falintil sira iha ai-laran ho halo estratéjia sira iha vila laran halo demostrasaun hasoru militár Indonézia. Nune’e, loke kaixa klandestina hodi fasilita mós Falintil bainhira iha ai-laran situasaun defisíl bele hamutuk ho sira lori hahan,” nia dehan.

Bainhira iha vila laran mak inimigu sira deskonfia sira makas ona, Falintil rekua fila-fali ba ai-laran tenke dook, tanba halo persegisaun oioin no ida-ne’e mak estabelese kaixa klandestina ne’e.

Manuel Locateli Gusmão Soares ‘Lotuk’ hateten, dalaruma manan funu hanesan mehi ida karik tanba inimigu ho forsa boot no Falintil ho de’it hanoin no tátika militár bele manan.

Enkuantu iha loron 04 fulan ne’e to’o agora ekipa AMRT kontinua iha Ossouala hodi rekolla dokumentu reizténsia nian hosi kaixa klandestina sira iha suku ne’e no iha Vemasse tasi nian.

Iha prosesu rekolla dokumentu rezisténsia ne’e, AMRT mós halo entervista ho responsavel kaixa klandestina no membru sira besik 80 ne’ebé daudaun ne’e seidauk termina.

Tuir ajenda, iha loron 16 outubru, AMRT sei realiza serimónia hodi ofisializa termu asinatura hodi entrega dokumentu rezisténsia hosi kaixa klandestina hanesan kaixa Soko, kaixa Sadere, kaixa Oe-Dolár, kaixa Fitun Mutin no kaixa Unidade/21.

Veteranu Locateli ho komunidade loké estrada  

Entretanu veteranu Manuel Locateli Gusmão Soares ‘Lotuk’ hamutuk ho komunidade Ossouala ho insiativa rasik loké estrada hosi área Bubuhomesa to’o Waihadaboho ba iha Vemasse Vila ho kilómetru sia (9).

“Inisiativa ha’u-nian hodi mobiliza joven sira, iha tinan hirak liu-bá loké estrada ne’e kee de’it ho manuál hanesan lori aisuak no kanuru mak suru,” Manuel Locateli Gusmão Soares hateten.

Antes ne’e, dalan ne’e iha ai-laran tuan no ho inistiva loké dalan bele fasilita movimentu komunidade sira-nian hodi ba to’o iha Vemasse Vila ba-mai Ossouala.

“Maibé, dalan ne’e iha tempu udan defisíl tebes tanba laiha kondisaun hanesan rai kuak no tahu. Nune’e husu ba Instititu Jesaun Ekipamentu (IJE) atu halo manutensaun,’’ nia dehan.

Entertantu, suku Ossouala, postu administrativu Vemasse, munisípiu Baucau, iha aldeia lima mak hanesan Caidenulale, Hoineuwai, Lolinunu, Waiknasa, no Umaiku ho totál populasaun hamutuk 2339 no xefe família kain 503. Maiória populasaun moris nu’udar agrikultór no suku ne’e iha potensialidade ba natar, pekuária haki’ak animál inklui produtu lokál sira hanesan modo no ai-fuan sira seluk.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here