Diretór ezekutivu SAMES, Santana Martins. Imajen Tatoli/Sérgio da Cruz.

DILI, 13 outubru 2021 (TATOLI)—Diretór Ezekutivu Servisu Autónomu Medikamentu no Ekipamentu Saúde (SAMES), Santana Martins, informa mekanizmu COVAX konfirma ona atu haruka vasina Pfizer doze 100.620, iha loron 16 outubru.

“SAMES liuhosi apoiu tékniku hosi UNICEF finaliza ona prosesu instalasaun ba jeleira no teste ba vasina Pfizer inklui fó ona formasaun ba tékniku sira atu simu vasina Pfizer ho doze 100.620 mai ita nia-rain iha semana ne’e”, Diretór Ezekutivu  SAMES hateten ba Agência TATOLI via telefónika, kuarta ne’e.

Tuir planu vasinasaun ne’e sei realiza iha eskola sira no ba alunu 50.000 sira hosi 60 to’o 110 ano, hosi munisípu pre-selesionadu ne’ebé maka sei simu vasina ba dahuluk. Vasina permite ba foin-sa’e sira ho idade hosi 12 to’o 17.

Iha faze daruak, sei vasina alunu sira seluk no ba foin-sa’e sira ne’ebé la rejista iha eskola sira.

Define mós katak, doze daruak hosi vasina ne’e sei administra ho intervalu loron 21.

Iha biban ketak, Adjunta Reprezentativa UNICEF  iha Timor-Leste, Alinhoa Jaureguibeitia, hateten Governu Timor-Leste deside ona atu introdús vasina Covid-19 (Covid-dizanove) ba labarik sira tinan 12 to’o 18 mai kraik.

“Governu Estadu Unidu Amérika halo doasaun vasina ne’e liuhosi fasilidade COVAX hamutuk doze 100. 620, sei to’o iha loron 16 outubru. Faze dahuluk sei vasina labarik ilejivél 50.000 iha munisípiu Dili no Liquiça”, nia informa.

Timor-Leste lansa ona vasina Covid-19 ba grupu prioritáriu no adultu sira seluk tinan 18 ba leten iha fulan abríl 2021.

Nune’e, Reprezentante UNICEF ne’e konsidera kampaña halo ho susesu, tanba to’o agora populasaun ilejivel 60%  simu ona vasina Covid-19 .

UNICEF iha kompromisu kontinua apoia Ministériu Saúde hodi fornese infraestrutura bázika nesesaria sira ba armazenamentu vasina ho temperatura ki’ik tebes.

“UNICEF hamutuk ho parseiru dezenvolvimentu sira, hanesan OMS (Organizasaun Mundiál ba Saúde), ita dezenvolve ona matéria komunikasaun ba manorin sira, inan-aman sira, no labarik sira atu asesu ba informasaun loloos, ho objetivu enkoraja labarik ho mestre sira atu simu vasina, maibé labele sai hanesan mandatóriu,” nia akresenta.

Jornalista : Felicidade Ximenes

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here