jogadór Ramelau kamiola mutin hadau malu bola ho jogador Boavista iha joga Futsal Praliga 2020/2021 iha kampu Futsal Fatuhada, 13/10. Imajen Tatoli/Antonio Goncalves

DILI, 13 outubru 2021 (TATOLI) – Ekipa Ramelau FC hatudu duni dignidade  hodi mantein lidera topu klasifikasaun ho pontu 45 iha jogu Pra Liga Futsal Timor -Leste, ne’ebé organiza hosi Assosiasaun Futsal Timor -Leste (AFTL).

Hahú iha novembru 2020 to’o 2021, seidauk iha ekipa futeból ho modalidade futsál ne’ebé hases Ramelau FC. Realidade ne’e hatudu, bainhira halakon 3-1 ho adversáriu Boavista FC Timor ho naran istimadu “Panteras Negras” iha jogu jornada 15 Pra Liga Futsal Timor –Leste ne’ebé hala’o, kuarta (13/10), kalan, iha kampu futsál FALINTIL-Forsa Defeza Timor –Leste (F-FDTL), Fatuhada.

Sai ona kultura iha mundu futeból, bainhira árbitru deside hahú jogu iha primeira parte, ekipa rua lansa kedan kontra no atake ba malu hodi buka vitória.

Iha minutu rua, Ramelau FC hatama golu ida ne’ebé oferese hosi nia jogadór Joel Fernandes hodi muda ona rezultadu eskore ba 1-0.

Jogadór Boavista kamizola mean kinur kontrola bola iha joga Futsal Pra liga 2020/2021 , iha kampu Futsal Fatuhada, kuarta (13/10). Imajen Tatoli/Antonio Goncalves

Hafoin golu dahuluk ne’e, jogadór Boavista la nonok, hahú esforsu hotu atu responde golu hosi Ramelau FC. Nune’e iha minutu 18, jogadór Boavista Bosco Martins lansa duni golu ida muda rezultadu ba 1-1 no sai golu ikus iha jogu primeira parte.

Tama jogu segunda parte, ekipa rua nafatin luta hodi hisik kosar hodi lansa kontra atake, duir bola hosi ain ba ain atu buka hatama golu.

 Nune’e, iha minutu 28, sorte ba jogadór Ramelau, Jaquel Pinto, lansa tan golu ida hodi lori rezultadu ba 2-1. Rítmu jogu aumenta manas tanba jogadór Boavista hahú jogu ho nervozu  no la kontrola aan.

Hosi frakeza la kontrola aan ne’e, loke tan oportunidade osan mean ba Ramelau. Iha minutu 36 jogadór Romulo Escurial tenke prodús golu ikus hodi muda metin rezultadu ba 3-1 to’o jogu ratama laiha tan golu.

Tanba ne’e, pontu tolu tenke monu nafatin ba Ramelau FC nia liman hodi lidera provizóriu topu klasifikasaun dahuluk ho pontu 45. Enkuantu Boavista  FC ho pontu 25.

Notísia relevante: Empate 1-1, Caesar Dante okupa topu klasifikasaun da-neen

Jornalista: Hortencio Sanchez

Editór : Florencio Miranda Ximenes

 

PUBLISIDADEiklan

HAKEREK NO HATÁN

Please enter your comment!
Please enter your name here