Jogadór Boavista kamizola mean kinur kontrola bola iha joga Futsal Pra liga 2020/2021 , iha kampu Futsal Fatuhada, kuarta (13/10). Imajen Tatoli/Antonio Goncalves

DILI, 13 outubru 2021 (TATOLI)– Ekipa futeból istimadu hosi munisípiu Bobonaro Kuda Ulun FC, obrigadu tenke fahe pontu ba malu ho nia adversáriu Caesar Dante FC, tanba rezultadu empate 1-1, iha jogu kontinuasaun Pra Liga Futsal Timor-Leste, iha jornada 15,  hala’o, kuarta, iha kampu futsal FALINTIL-Forsa Defeza Timor – Leste (F-FDTL),Fatuhada-Dili.

Durante minutu 40 nia laran ekipa rua ne’e hatudu tékniku no kontra ho atake ba malu tuir abilidade, maibé ekipa nia forsa jogu hanesan.

Hakur ba minutu haat iha jogu primeiru parte, jogadór Caesar Dante lees ona golu primeiru hosi, Leonildo Tores hodi muda eskore ba 1-0.

Ho golu ne’e, rítmu jogu  hahú manas liután, no   ekipa rua kontinua lansa bola ba malu, laiha golu ruma maka akontese.

Ekipa Kuda Ulun joga kalma ho modelu ofensivu. Enkuantu Caesar Dante joga ho modelu defensivu no ho ofensivu atu buka hatama tan golu, defeza Kuda Ulun la fó oportunidade.

Nune’e, to’o minutu primeira parte ramata laiha tan golu ruma mak akontese ba ekipa rua, no ekipa Caesar dante lidera provizóriu ho 1-0.

Dolar ba segunda parte ekipa rua nafatin hatudu jogu bonito, maibé Kuda Ulun esforsu makas atu halo empate jogu ne’e.

Mehi Kuda Ulun la sai de’it mehi tanba iha minutu 2, jogadór Samuel Reis responde kedan golu ida hodi muda eskore ba 1-1.  

To’o minutu  segunda parte ramata laiha golu,  nune’e ekipa rua tenke empate hodi fahe pontu tolu ba malu.

Daudaun ne’e, Caesar Dante okupa iha tabela klasifikasaun provizóriu iha pozisaun da-neen (6) ho pontu 28. Enkuantu Kuda Ulun hela metin iha lina mean ho pozisaun 20 ho pontu 11.

Notisia relevante: Pra Liga Futsal, Jerman manan “mihis” Boavista

Jornalista: Hortencio Sanchez

Editór: Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here