Prezidente Konsellu Administrasaun EDTL, E.P, Paulo da Silva. Imajen TATOLI/Francisco Sony

DILI, 13 outubru 2021 (TATOLI)–Eletricidade de Timor-Leste, Empreza Públika (EDTL, E.P, sigla portugés) iha kuarta ne’e, simu kontadór pre-pagu eletrisidade faze dahuluk hamutuk 5.000 hosi kompañia indonéziu, Lidvi.

“Kontadór ne’ebé ita sosa hosi kompañia Lidvi hamutuk 120.000, maibé ohin ne’e simu uluk 5.000 hodi hatama ba armazen instituisaun no sira seluk sei mai iha samana ida-ne’e to’o fulan dezembru,” Prezidente Konsellu Administrasaun EDTL, E.P, Paulo da Silva, hateten iha ninia knaar fatin, edifísiu Caicoli.

Notísia relevante: Kámara Konta hahú analiza konkursu akizisaun kontadór pre-pagu 100.000

Kontadór mai ho tipu rua, monofáziku hamutuk 4.000 no kontadór ba trifáziku 1.000, ho totál kustu hamutuk millaun $5-resin.

Tuir Prezidente Konsellu Administrasaun, ba oin sei fó prioridade ba kliente sira iha kapitál Dili no semana oin mak distribui ba munisípiu sira.

Kontadór hamutuk 20.000 sei tama iha sesta semana ne’e, tanba ne’e ba oin tenke lori monta iha kliente EDTL sira nia uma, ne’ebé durante ne’e uza eletrisidade maibé seidauk uza kontadór.

“Antes ne’e ita tolera oituan ba sira ne’ebé la uza kontadór tanba situasaun COVID-19, ne’ebé ita la halo inspensaun maibé agora EDTL atu rekupera no sei halo filafali inspensaun ba kliente sira ne’ebé iha ligasaun ilegál, tanba ne’e obrigatóriu tenke uza kontadór,” nia akresenta.

Daudaun ne’e, kliente EDTL iha territóriu Timór laran tomak ne’ebé uza kontadór pre-pagu hamutuk 197.000, enkuantu ida seidauk uza pre-pagu hamutuk 75.000 maibé iha ligasaun direta no la selu.

“Tanba ne’e kontadór hamutuk mak sei mai hamutuk 120.000, ne’ebé balun mai ona no balun sei prosesu, ba kliente hamutuk 75.000 ne’ebé ligasaun direita inklui projetu eletrisidade ne’ebé agora ita atu implementa,” nia akresenta.

Bazeia ba lei númeru 33/2016, 16 agostu, kona-ba tarifa EDTL inklui koima sira, katak kliente hotu bainhira uza enerjia eletrisidade tenke selu ka sosa pre-pagu.

Antes ne’e, EDTL rejista konsumidór dada ahi ilegál pur volta 30.000, tanba laiha pre-pagu foun atu halo instalasaun.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here